नाशिक रोड : देवळाली मतदारसंघातील देवरगाव परिसरातील वैष्णवनगर (वैसनपाडा) येथील ग्रामस्थांनी पन्नास वर्षे अंधारात काढले. मात्र, आमदार सरोज अहिरे यांच्या माध्यमातून वीजपुरवठा सुरू झाल्याने नागरिकांच्या चेहऱ्यावर आनंद ओसंडून वाहत होता.

तालुक्यातील देवरगाव हद्दीतील वैष्णव नगर याठिकाणी गेल्या ५० वर्षांपासून लोकवस्ती तयार झाली आहे. मात्र, तेथे वीज नसल्याने लोकांची मोठी गैरसोय होत होती. कित्येक वर्षांपासून हा प्रश्न दुर्लक्षित होता. मतदारसंघातील इतर विकास कामांबरोबरच या ठिकाणी विजेचा प्रश्न गांभीर्याने घेत आमदार सरोज अहिरे यांनी महावितरण कंपनीच्या अधिकाऱ्यांना या भागात वीजपुरवठा सुरू करण्याबाबत सूचना केल्या. त्यानुसार अधिकाऱ्यांनी येथे वीजपुरवठा सुरू केला.

आमदार सरोज अहिरे यांच्या हस्ते वीजपुरवठा सुरू करण्यात आला. राष्ट्रवादी कॉंग्रेसचे जिल्हा कार्याध्यक्ष विष्णुपंत म्हैसधुने, तालुका कार्याध्यक्ष निवृत्ती कापसे, पंचायत समितीचे माजी उपसभापती ढवळू फसाळे, कैलास बेंडकुळे, सरपंच काशिनाथ मोंढे, दिनकर मोंढे, अविनाश कसबे, विशाल गायकर, उपसरपंच प्रकाश मोंढे, मंगळू पिंपळके, लक्ष्मण भोये, सागर पिंपळके व ग्रामस्थ उपस्थित होते.