नाशिक : (येवला) कोरोनामुळे विधवा आणि स्वत:सह नऊ वर्षांच्या चिमुकल्याचाही रिपोर्ट पॉझिटिव्ह, असे तिहेरी दु:ख वाट्याला येऊनही त्यावर यशस्वीपणे मात केली खरी; पण पोटच्या गोळ्यासह घरी परततानाचा आनंद व्यक्त करण्यासाठी आयुष्याचा जोडीदारच सोबत नसल्याची रूखरूख या माउलीने अश्रूंद्वारे व्यक्त करत ही माउली कोरोनामुक्तीचा आनंद, पती निधनाचे दु:ख आणि चिमुकल्याचे कौतुक अशा संमिश्र भावना घेऊनच घरी परतली.
पतीच्या अंत्यसंस्कारासाठीही जाता आले नाही
कोरोनाच्या संकटकाळात "इम्युनिटी' म्हणून प्रसिद्धी पावलेली प्रतिकारशक्ती आणि मूलत: प्रचंड इच्छाशक्तीच्या जोरावर साक्षात मृत्यूशी यशस्वी झुंज देण्याची अनेक उदाहरणं आता समोर येत आहेत. पण, त्यातही विरळा म्हणता येईल, असा हा हृदयद्रावक तेवढाच प्रेरणादायी अनुभव शनिवारी (ता.13) येवलावासीयांनी घेतला. शहरात कोरोनाचा कहर सुरू असताना सर्वच रुग्ण बरे होऊन घरी परतत होते. अशातच एका रुग्णाची कोरोनाविरुद्धची लढाई अयशस्वी ठरली. काही दिवस आजार अंगावर काढल्याची व उपचारात दिरंगाईची ही परिणीती होती. शहरातील ही पहिली घटना सर्वांना हादरवणारीच होती. त्यापेक्षाही दु:खदायी बाब म्हणजे, संबंधित रुग्णाची पत्नी अन् नऊ वर्षांच्या चिमुरड्याचाही कोरोना अहवाल पॉझिटिव्ह आला होता. एकीकडे पतीचा नाशिक येथे मृत्यू झाला, त्या वेळी येथे क्वारंटाइन असल्यामुळे अंत्यसंस्कारासाठीही जाता आले नाही अन् चिमुकल्याच्या काळजीतच रुग्णालयात दाखल व्हावे लागले.
आनंदासोबतच खूप काही गमावल्याचे दु:खही
नियतीने जणू संकटांची मालिकाच उभी केलेली. त्यात आणखी भरीस भर म्हणून, दुसऱ्या सहावर्षीय चिमुकल्याचा कोरोना अहवाल निगेटिव्ह येऊनही त्याला सांभाळण्याचाही प्रश्न निर्माण झाला. अर्थात, त्याला नातेवाइकांनी आधार दिला. पण, आठवडाभर संकटांची ही मालिका झेलत आणि जगण्यासाठी उभे राहणारे असंख्य प्रश्न मनात साठवत या माउलीने अन् तिचाच आदर्श समोर ठेवत तिच्या मुलानेही मोठ्या खंबीरपणे कोरोनाला हरवले. शनिवारी दुपारी बाभूळगाव येथील कोविड केअर सेंटरमधून दोघांना सन्मानपूर्वक निरोप देण्यात आला. त्या वेळी आजारातून बरी झाल्याच्या आनंदासोबतच खूप काही गमावल्याचे दु:खही तिच्या अश्रूंमधून जाणवत होते. त्याचवेळी, नियतीने उभे केलेले अनेक प्रश्न यापुढे, कोरोनावर मात केली तद्वत्च खंबीरपणे सोडविण्याची जिद्दही या माउलीच्या डोळ्यात नकळतपणे जाणवत होती..!
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.