नाशिक : बेलगाव कुऱ्हे (ता. इगतपुरी) येथे पोल्ट्री फार्मच्या आडून चालविला जाणारा बनावट देशीदारुचा कारखानाच राज्य उत्पादन शुल्क विभागाच्या हाती लागला आहे. जमिनीत खोलवर दारुसाठी वापरण्यात येणार्या स्पीरिटच्या टाक्या आढळून आल्या.

याप्रकरणी दोघांना अटक करण्यात आली आहे. एक्साईजच्या पथकाने सुमारे १४ लाखांचा साठा व साहित्य जप्त केले आहे. (Fake liquor factory busted in Poultry farm Excise team raid at Belgaon Kurhe Nashik Crime)

संजय भिमाजी गुळवे, बच्चू मंगा भगत अशी अटक करण्यात आलेल्या संशयितांची नावे आहेत. राज्य उत्पादन शुल्क विभागाचे अधीक्षक शशिकांत गर्जे यांना बेलगाव कुऱ्हे या गावानजिक पोल्ट्री फार्मच्या आडून बनावट देशी दारु निर्मितीचा कारखाना सुरू असल्याची खबर मिळाली होती.

त्यानुसार, त्यांच्या मार्गदर्शनाखाली एक पथक गेल्या चार दिवसांपासून याठिकाणी पाळत ठेवून होती. बनावट दारूच्या कारखान्याची खात्री पटताच, मंगळवारी (ता. १६) मध्यरात्री एक्साईजच्या पथकाने मल्हार पोल्ट्री फार्मवर छापा टाकला.

त्यावेळी त्याठिकाणी बनावट देशीदारुची निर्मिती सुरू असल्याचे आढळून आले. याठिकाणी शुद्ध आरोचे पाणी, मद्य भरण्यासाठीचे बॉटलिंग मशिन, बनावट मद्याने भरलेले ८३ बॉक्स पथकाच्या हाती लागले.

तसेच, कारखान्यात जमिनीत खोलवर स्पीरिटचे ड्रम गाडलेले होते. बनावट मद्यासह साहित्य असा १४ लाख २७ हजार ६१० रुपयांचा मुद्देमाल पथकाने जप्त केला.

सदरची कामगिरी एक्साईजचे उपायुक्त डॉ. बी.एच. तडवी, अधीक्षक शशिकांत गर्जे यांच्या मार्गदर्शनाखाली पथक निरीक्षक आर.सी. केरीपाळे, सुनील दिघोळे, कैलास कसबे, राहुल पवार, विजेंद्र चव्हाण यांनी केली आहे. तपास निरीक्षक आर.सी. केरिपाळे हे करीत आहेत.