नाशिक : जिल्हा न्यायालयातील विविध न्यायालयांमध्ये दाखल करण्यात आलेल्या ८१ जामीन (Bail) प्रकरणांमध्ये संशयित १७ जणांनी बनावट दस्तऐवज, कागदपत्रे बनवून विविध नावांचा वापर करत आरोपींना जामीनदार राहून शासनाची फसवणूक केल्याप्रकरणी सरकारवाडा पोलिस ठाण्यात गुन्हा दाखल झाला आहे.

मार्च ते ऑक्टोबर २०२१ यादरम्यान जिल्हा न्यायालयातील विविध न्यायदान कक्षांमध्ये दाखल असलेल्या जामीन प्रकरणांमध्ये संशयितांनी आरोपींना खोटी व बनावट कागदपत्रे बनवून वेगवेगळी नावे वापरून जामीन मिळवून देत शासनाची फसवणूक केली असल्याचे प्रकार समोर आला. त्यानंतर सरकारवाडा पोलिसांनी याप्रकरणी या संशयितांविरुद्ध फसवणुकीचा गुन्हा दाखल केला आहे, तसेच या सर्व संशयितांना बनावट दस्तऐवज (Fake documents) तयार करून देणाऱ्या कल्पना पाटील, इम्रान पिंजारी, जावेद पिंजारी यांच्याविरुद्धही मुख्य दंडाधिकारी व न्यायालयाची फसवणूक केली, म्हणून गुन्हा दाखल केला आहे.

हे आहेत संशयित

रीना ऊर्फ नीता नवले (रविवार पेठ), मंगल संजय वाघ (गंगापूर गाव), युवराज निकम (खामखेडा, ता. देवळा), मधुकर जाधव (पिंपळगाव बहुला), लक्ष्मण खडताळे (गोवर्धन), राधिका ऊर्फ रझिया शकील खाटी (पाथर्डी गाव), इक्बाल पिंजारी (वडाळागाव), पंरा (जातेगाव), राजू वाघमारे (त्र्यंबकेश्‍वर), रवी मोतीराम पाटील (मातोरी).