वणी (जि.नाशिक) : नाशिक जिल्ह्यात सध्या कोरोना संसर्ग झपाट्याने वाढत असताना ग्रामीण भागासह शहरातही गूळवेल (अमृतवेल) या वनस्पतीला मोठ्या प्रमाणात मागणी वाढली आहे. अनेक आजारांवर गूळवेल गुणकारी असल्यामुळे शहरातील असंख्या कुटुंबाकडून त्याची मागणी होत आहे

गुळवेल म्हणजे संजीवनीच!

गूळवेल ही वनस्पती शरीराची रोगप्रतिकार शक्ती वाढविण्यास मदत करीत असल्यामुळे कोरोना संसर्ग टाळण्यासाठी अनेक कुटुंबानी गूळवेलचा काढा घेण्यास पंसती दिली आहे. अनेक आजारांवर ही वेल अमृतवेल ठरत असल्याचे मत जाणकारांनी व्यक्त केले आहे. गूळवेलचा काढा सेवन केल्याने ताप, सर्दी, खोकला, डोकेदुखी, थंडी, मळमळ, मूळव्याध, साधेदुखी, आम्लपित्त, काविळ, पोटदुखी, मुधमेह आटोक्यात येतो, असे सांगितले जात आहे. त्याप्रमाणे डेंगी, चिकन गुनिया, स्वाइन फ्लू या आजारांवर गूळवेल गुणकारी असल्यामुळे शहरातील असंख्या कुटुंबाकडून त्याची मागणी होत आहे.

गुळवेलला मोठी मागणी

ग्रामीण भागात कडुनिंबाच्या झाडावर व आंब्याच्या झाडावर गुलवेल ही वनस्पती मोठ्या प्रमाणात वाढलेली दिसून येत असते. कडुनिंबाच्या झाडावरील गुळवेलला मोठी मागणी आहे. या वेलीची ओळख ग्रामीण भागातील जाणकार व्यक्तींनाच आहे. कोरोनाचा संसर्ग वाढल्यासून अनेक कुटुंब गूळवेल काढ्याचे सेवन करीत आहे. काहीजण या वेलीचे छोटे तुकडे करून रात्री पाण्यात भिजत ठेवतात. सकाळी उपाशीपोटी या पाण्याचे सेवन करतात. तर, काही कुटूंब या वेलीचे तुकडे पाण्यात टाकून ते पाणी उकळून पितात. गूळवेल हा एक रानभाजीचा प्रकारही मानला जातो.

गूळवेलचे फायदे...

- रोगप्रतिकारक क्षमता वाढते

- ताप कमी होण्यास मदत

- मलेरिया, टॉयफाइडवर फायदेशीर

- पोटाच्या समस्या दूर होतात

- मधुमेहावर गुणकारी

- दम, खोकला आणि कफ कमी होतो

- लहान मुलांची स्मरणशक्ती वाढते