जुने नाशिक : भद्रकाली गुन्हे शोध पथकाने उत्कृष्ट कामगिरी करत अवघ्या तीन दिवसांत दोन साखळीचोरांनी अटक केली.

चौकशीत दोन गुन्हे उघडकीस आले. त्यांच्याकडून तीन लाख १८ हजारांचा ऐवज जप्त करण्यात आला. (Gold chain thieves arrested by Bhadrakali police in 3 days Nashik Crime)

द्वारका चौकात गुरुवारी (ता. ४) चारचाकी गाडीत बसलेल्या महिलेची सोनसाखळी ओरबाडण्याचा प्रकार घडला होता. महिलेच्या तक्रारीवरून भद्रकाली पोलिस ठाण्यात गुन्हा दाखल करण्यात आला होता.

गुन्हे शोध पथक संशयितांच्या मागावर होते. द्वारका परिसरातील सीसीटीव्ही फुटेज ताब्यात घेतले होते. त्यात दोन जण सोनसाखळी ओरबाडताना दिसून आले. त्याआधारे पथकाने त्यांचा शोध घेतला.

दोघेही संशयित विडी कामगारनगर, पंचवटी भागात राहात असल्याची माहिती मिळाली. वरिष्ठ पोलिस निरीक्षक गजेंद्र पाटील, पोलिस निरीक्षक तृप्ती सोनवणे यांच्या मार्गदर्शनात सहाय्यक पोलिस निरीक्षक सत्यवान पवार, सतीश साळुंके, अविनाश जुंद्रे, नितीन भामरे, धनंजय हासे, नीलेश विखे, सागर निकुंभ, दयानंद सोनवणे, नारायण गवळी यांनी संपूर्ण भागाची चाचपणी केली.

रविवारी (ता. ७) संशयित ओंकार उर्फ दीपक वसंत शिंदे (वय २३), रोशन सुधाकर कटारे (वय २३, दोघे रा. विडी कामगारनगर, पंचवटी) यांना ताब्यात घेतले. दोन दिवस त्यांची कसून चौकशी केल्यानंतर त्यांनी दोन्ही गुन्हे केल्याची कबुली दिली.

पोलिसांनी त्यांच्याकडून गुन्ह्यात वापरलेली दुचाकी (एमएच १५, जीटी ९०५८), दोन सोनसाखळ्या असे सुमारे तीन लाख १८ हजारांचा ऐवज जप्त केला.