नाशिक रोड - महामानव विश्वरत्न डॉ. बाबासाहेब आंबेडकर यांच्या जयंतीनिमित्त नाशिक रोड परिसरात भीमकन्या बाईक रॅली काढण्यात आली. सुमारे अडीचशे युवती एकत्रित येऊन त्यांनी महामानवास आगळ्या आणि वेगळ्या पद्धतीने संपूर्ण नाशिक रोड शहरात बाईक रॅलीच्या माध्यमातून अभिवादन केले.

डोक्यावर निळा फेटा आणि अंगावर पांढरे रंगाचे वस्त्र परिधान केले होते. नाशिक रोड परिसरात फेरी काढून बाबासाहेबांचा विजय असो, बोलो, बोलो जयभीम घोषणांनी वातावरण संपूर्ण निळेमय केले होते. बाईक रॅलीत साधारण अडीचशे युवतींनी सहभाग घेतला होता. रॅलीची सुरवात नाशिक रोड महाकर्मभूमी बुद्धविहार येथून सुरवात होऊन रमाबाई आंबेडकरनगर, विहीतगाव, बिटको पॉइंट, शिवाजीनगर, सैलानी बाबा, इंदिरा गांधी पुतळा, मंगलमूर्ती नगर, जेल रोड आदी भागातून ही रॅली काढण्यात आली होती. रॅलीमध्ये मानसी जाधव, प्रीतम साळवे, शिल्पा पंडित, स्वीटी भोळे, दिव्या भोळे, प्राजक्ता पंडित, तेजल आढाव, प्राजक्ता गांगुर्डे, माधुरी पंडित, प्रियांका टेपले, कीर्ती ब्राह्मणे, नीता सोनकांबळे आदी सहभागी झाल्या होत्या.