कसबे सुकेणे (जि. नाशिक) : मौजे सुकेणे व परिसरात सोमवारी (ता. २८) पावसाने दमदार हजेरी लावली. रविवारी (ता. २७) रात्रभर रिमझिम पाऊस सुरू होता. आज सायंकाळी पाचनंतर विजांच्या कडकडाटासह परिसरात जोरदार पाऊस सुरू झाल्याने बळीराजा सुखावला आहे. या पावसाने पेरणीयोग्य पाऊस झाल्याने आता शेतीकामास गती येणार आहे.

सद्यःस्थितीत परिसरात सोयाबीन, मका या नगदी पिकांसह भाजीपाला पिकांमध्ये टोमॅटो, फ्लॉवर, कोबी या पिकांचेही मोठ्या प्रमाणात लागवड झालेली आहे. मागील पंधरा दिवसांपासून बळीराजा पावसाकडे नजर लावून बसला होता. दोन दिवसांपासून सुरू झालेल्या पावसाने बळीराजा समाधान व्यक्त करत आहे. पावसामुळे ऊसलागवडीचे प्रमाणदेखील वाढणार आहे.
(Heavy rains in Kasbe Sukene area)