सिन्नर (जि. नाशिक) : तालुक्याच्या पूर्व भागात वावी परिसरात आज पावसाने जोरदार (Heavy Rains) हजेरी लावली. वावीसह काहंडळवाडी, दुसंगवाडी परिसरात दुपारी बारापासून सायंकाळी चारपर्यंत पावसाची सलग बॅटिंग सुरू होती. या जोरधारेमुळे परिसरात सर्वत्र पाणीच पाणी झाले होते. वावी येथील आठवडे बाजारदेखील पावसामुळे सायंकाळी चारनंतर भरला. मान्सूनच्या जोरदार सलामीमुळे वावी परिसरातील बळीराजा (Farmer) सुखावला आहे. (Heavy rains in Wavi Nashik news)

गेल्या आठवड्यात देखील मान्सूनपूर्व पावसाने हजेरी लावली होती. जोरदार पावसाच्या प्रतीक्षेत असलेल्या शेतकऱ्यांना आजच्या पावसाने दिलासा मिळाला आहे. शेतात वापसा झाल्यानंतर पेरणीच्या कामांना वेग येणार आहे. परिसरात दुपारी बारापासून सुरू झालेला पाऊस थोडी विश्रांती घेत सलग चार तास कोसळत होता. यामुळे वावी येथील मंगळवारच्या आठवडे बाजारावर विरजण पडते की काय अशी परिस्थिती होती. मात्र, चार वाजेनंतर पावसाने उसंत घेतल्याने ऊन पडल्यावर बाजारात गर्दी झाली होती. आजच्या पावसाने परिसरात सर्वत्र शेतांमध्ये पाणी साचले होते.

समृद्धी महामार्ग परिसरात मात्र शेतकऱ्यांना नुकसानीचा सामना करण्याची वेळ आली. समृद्धी महामार्गावरून वाहणारे पाणी शेतांमध्ये घुसल्याने आणि पिके पाण्याखाली बुडाली होती.