नाशिक : पाथर्डी फाटा येथील एका हॉटेलमध्ये झालेल्या एक लाख रुपये चोरीचा अंबड पोलिस ठाण्याच्या गुन्हे शोध पथकाने अवघ्या तीन तासांत शोध लावून रोकड जप्त केली. हॉटेल शिवसागरमधील दुसऱ्या मजल्यावरील किचनमधून एक लाख रुपयांची चोरी झाली होती.

कामगारानेच मारला डल्ला

चोरी झाल्याचे लक्षात येताच हॉटेलचे व्यवस्थापक अमित अशोक गद्रे यांनी दिलेल्या तक्रारीनुसार अंबड पोलिस ठाण्यात गुन्हा दाखल करण्यात आला होता. प्रभारी निरीक्षक नंदन बगाडे, निरीक्षक श्रीकांत निंबाळकर यांच्या मार्गदर्शनाखाली सहाय्यक निरीक्षक गणेश शिंदे, किरण गायकवाड, अनिरुद्ध येवले, हेमंत आहेर, जनार्दन ढाकणे, राकेश राऊत, योगेश शिरसाट, मुकेश गांगुर्डे, तुळशीराम जाधव, प्रशांत नागरे आदींच्या पथकाने हॉटेलमध्ये सीसीटीव्ही फुटेज तपासले. यावरून हॉटेलमधील कामगार धनबहादूर छकबहादूर सारू (२२) याला पोलिसांनी ताब्यात घेऊन त्याच्याकडे चौकशी. त्याच्या बॅगेत एक लाख रुपये मिळून आले. पोलिसांनी अवघ्या तीन तासांत या गुन्ह्याचा शोध लावला. याप्रकरणी संशयितास १४ दिवस न्यायालयीन कोठडी सुनावण्यात आली आहे.