इंदिरानगर (जि. नाशिक) : वासननगरमधील साई अर्णव इमारतीच्या सदनिकेत शॉर्टसर्किटमुळे लागलेल्या आगीत घरगुती सामान जळाल्याची घटना रविवारी (ता. २९) साडेनऊच्या सुमारास घडली. (Household items got burnt due to short circuit Nashik News)

हेही वाचा :....इथं बनतो आपला लाडका तिरंगा

चामुंडा माता मंदिराजवळ असलेल्या साई अर्णव अपार्टमेंटमध्ये पहिल्या मजल्यावर प्रकाश जोशी राहतात. सायंकाळी ते मुलीकडे गेले असता रात्री अचानक त्यांच्या घरातून धूर येऊ लागल्याने रहिवाशांनी जोरजोरात आवाज देण्यास सुरवात केली.

रवींद्र गामणे यांनी अग्निशामक दलाला तत्काळ घटनेची माहिती कळवली. अग्निशामक दलाने घरात प्रवेश करून आग विझविली. शॉर्टसर्किट मुळे आग लागल्याचा प्राथमिक अंदाज असून त्यात फ्रिज जळून खाक झाले तर किचनमध्ये असणारे प्लास्टिकच्या वस्तू जळून खाक झाल्या आहेत. इमारतीमध्ये १६ सदनिका आहेत. वेळीच ही बाब लक्षात आल्याने पुढील अनर्थ टळला.