जायखेडा (जि. नाशिक) : १६ गाई व ४ गोऱ्हे अशा एकूण २० जनावरांची बेकायदा वाहतूक करताना ट्रकसह सोळा लाख ३० हजारांचा मुद्देमाल जायखेडा पोलिसांनी जप्त केला. ट्रकचालक, मालक व त्यांच्या साथीदारास अटक करण्यात आली आहे. कातरवेल गावाजवळ रविवारी (ता. ६) सकाळी साडेनऊच्या सुमारास सदर कारवाई करण्यात आली.

पिंपळनेरकडून मालेगावकडे २० जनावरांना ट्रकमध्ये अमानुषपणे कोंबून घेऊन जात असल्याची गुप्त माहिती पोलिसांना मिळाली. त्यावरून जायखेड्याचे (Jaikheda) सहाय्यक पोलिस निरीक्षक श्रीकृष्ण पारधी, पोलिस उपनिरीक्षक नवनाथ रसाळ व त्यांच्या पथकाने सापळा लावला. त्यात संशयित ट्रक (क्र. MH- 41- AU- 1703) मालेगावकडे जात असताना पोलिसांनी चालकाला थांबण्याचा इशारा केला. परंतु, चालकाने ट्रक पळविण्याचा प्रयत्न केला. पोलिसांनी सिनेस्टाइल पाठलाग करत कातरवेलजवळ ट्रक पकडला.

या वेळी पोलिसांनी १६ गाई व ४ गोऱ्हे आणि ट्रक असा एकूण 16 लाख 30 हजार रुपयांचा मुद्देमाल जप्त केला. ट्रकचालक व मालक अल्ताब अहमद शब्बीर अहमद (वय ३५, रा. हसनपुरा, मालेगाव), शेख शाहिद शेख रशीद (वय २३, रा. इस्लामपुरा मालेगाव) या दोघांना पोलिसांनी अटक केली. जखमी जनावरांवर खासगी पशुवैद्यक (veterinarian) डॉ. कपिल अहिरे यांनी उपचार केले. गावातील सामाजिक कार्यकर्त्यांनी चारा व पाण्याची व्यवस्था केली.

याप्रकरणी गुन्हा दाखल करण्यात आला असून, पोलिस निरीक्षक श्रीकृष्ण पारधी, पोलिस उपनिरीक्षक नवनाथ रसाळ यांच्या मार्गदर्शनाखाली पोलिस हवालदार राजेश सावळे, दीपक भगत, पोलिस हवालदार जगताप, पोलिस हवालदार राऊत, पोलिस हवालदार बावरी, होमगार्ड चतुर सोनवणे, अंकित घरटे, तुषार मोरे, राकेश नवसार यांनी ही कारवाई केली.