Nashik News : आतापर्यंत मोकाट कुत्र्याने चावा घेऊन अनेकांना जखमी केल्याच्या घटना आपण ऐकल्या आणि बघितल्या आहेत.

मात्र इंदिरानगरमध्ये एका मांजराने केलेल्या हल्ल्यात गंभीर जखमी होण्याची वेळ सुयोग ताडे यांच्यावर आली आहे.(Injured by cat attack and Time to take 20 injection nashik news)

सोसायटीमध्ये फिरणाऱ्या मांजराला दूध पाजणे ताडे यांना चांगलेच महागात पडले असून, या मांजरीने केलेल्या हल्ल्यात त्यांच्या उजव्या हाताला गंभीर जखमा झाल्या असून, गेल्या दहा दिवसांपासून ते शासकीय रुग्णालयात या संबंधित उपचार करून घेत आहेत.

वडाळा पाथर्डी रस्त्यावर असलेल्या महालक्ष्मी अपार्टमेंटमध्ये ताडे राहतात. या ठिकाणी या मांजरीचा नेहमीचा वावर होता. तिने पिलेदेखील येथे जन्माला घातली होती. त्यामुळे ताडे या मांजराला आठवणीने दूध द्यायचे.

१४ डिसेंबरला नेहमीप्रमाणे ही मांजर दिसल्यावर त्यांनी तिच्यासमोर दूध ठेवले आणि अचानक या मांजरीने त्यांच्यावर हल्ला केला. या हल्ल्यात त्यांच्या उजव्या हाताला तिने १५ ते १६ ठिकाणी पायांनी बुचकारले तर चार ते पाच ठिकाणी चावा घेतला. रक्तबंबाळ झाल्याने शासकीय रुग्णालयात त्यांनी धाव घेतली.

एकंदर परिस्थिती पाहून डॉक्टरांनी त्यांना यासाठी आवश्यक असलेले वीस इंजेक्शन्स घ्यावे लागतील, असे सांगितले आहे. त्यातील १८ पूर्ण झाले असून दोन इंजेक्शन घेणे शिल्लक आहेत. अचानक झालेल्या या प्रकाराने नागरिक मात्र भयभीत झाले असून, रस्त्याने दिसणाऱ्या मांजर तसेच कुत्र्यांपासून दोन हात लांब राहा अशा सूचना देत आहेत.