नाशिक : जिल्ह्यातील व मालेगाव तालुक्यातील निमगुले साकुरी येथील जवान चीनच्या सीमेवर शहीद झाल्याची माहिती प्राप्त होत आहे. सचिन विक्रम मोरे असे या जवानाचे नाव असून ते काल (ता. २४) रात्री चीनच्या सीमेवर कर्तव्य बजावत असताना शहीद झाले असल्याचे समजते. दोन दिवसांनी त्यांचे पार्थिव आधी पुणे येथे नंतर नाशिकहून त्यांच्या मूळगावी पोहोचविण्यात येणार असल्याची माहिती लष्करी अधिकाऱ्यांनी त्यांच्या कुटुंबियांशी बोलताना दिली.

अशी आहे घटना

सध्या भारत आणि चीन सीमेवर गलवान खोऱ्यात तणावाचे वातावरण आहे. याठिकाणी दोन्ही देशांकडून रस्त्याचे बांधकाम सुरु आहे. याच ठिकाणी भारताकडून एक पूल बांधणीचे काम सुरु होते. याच वेळी चीनने नदीत पाणी सोडल्यामुळे ही दुर्घटना घडल्याचे लष्करी अधिकाऱ्यांनी सांगितले. नदीला पाणी सोडल्यामुळे तीन जवान वाहून चालले होते. त्यांना वाचविण्याच्या प्रयत्नात सचिन यांनी नदीत उडी घेतली. परंतु नदीतील दगडावर तो कोसळल्याने तो शहीद झाल्याची माहिती सचिनच्या कुटुंबियांना लष्करी अधिकाऱ्यांनी दिली. सचिनचे पार्थिव उद्या निघणार असून रात्रीपर्यंत पुणे येथे पोहोचेल. त्यानंतर पुण्याहून हे पार्थिव नाशिकमध्ये येईल. 

हेही वाचा > ह्रदयद्रावक! सकाळी हसतमुख दिसलेल्या लेकीची दुपारी डेडबॉडीच...आईने फोडला हंबरडा

नाशिकमधून पार्थिव मालेगाव तालुक्यातील निमगुले या मूळगावी शनिवारी (ता. २७) रोजी सकाळी पोहोचण्याची शक्यता आहे. सचिन 17 वर्षापासून भारतीय सेनेत कार्यरत होते. ते इंजिनिअर होते. मागील एक वर्षापासून भारत-चीन सीमेवर तैनात होते. सीमेवर पूल, व रस्ते बनवण्याचे काम सुरू असतांना अचानक चीनकडून नदीत पाणी सोडण्यात आल्यामुळे काही जवानांना वाचविण्याच्या प्रयत्नात सचिन यांना वीरमरण आले.

हेही वाचा > सावध व्हा...'हा' आजार पडेल महागात...कोरोनाचे व्हाल बळी!