नांदूरमध्यमेश्‍वर : कर्तृत्ववान महिलांनीच जगाचा इतिहास घडवला आहे. त्याग, सोशिकतेबरोबरच प्रसंगी दुर्गेचा अवतार धारण करणारी व स्वतःच्या जिवाची पर्वा न करता दुसऱ्यांना जीवदान देणारी स्री मानव जातीचा आधार आहे.

याचाच प्रत्यय नुकताच शिवरे (ता. निफाड) येथील माजी सरपंच रंजना सानप यांच्या दातृत्वातून आला आहे. ( kidney gift from an elder sister to younger sister nashik news)

ताडदेव, मुंबई येथील त्यांची लहान बहीण अपर्णा बुरकुल (वय ४३) यांची दोन वर्षांपूर्वी किडनी निकामी झाल्याने त्यांना आठवड्यातून तीनदा डायलिसीस करावे लागत होते. किडनी मिळाल्यास त्यांचे आयुष्य वाढणार होते.

यासाठी रक्ताच्या नात्यातील कुणाची तरी किडनी आवश्यक होती. यामुळे जिवाची पर्वा न करता लहान बहिणीला जीवदान मिळाले पाहिजे, या प्रेमापोटी रंजना सानप यांनी आपली किडनी देऊन लहान बहिणीचे प्राण वाचवत आयुष्य वाढण्यासाठी नववर्षाची भेट दिली आहे.

कुटुंबप्रमुख म्हणून जबाबदारी, निर्णय घेण्याची क्षमता, कुटुंबाचे पाठबळ आणि सरपंचपद भूषविलेले असल्याने समाजसेवेचा जवळून अनुभव असलेल्या सानप यांनी लहान बहिणीचा जीव वाचण्यासाठी स्वतःची किडनी देऊ केली.

डॉक्टरांच्या सल्ल्याने काही तपासण्या करून किडनी जुळत असल्याने परेल, मुंबई येथील ग्लोबल दवाखान्यात किडनी रोपण शस्त्रक्रिया झाली. दोन्ही बहिणींची प्रकृती ठणठणीत आहे.

"शिवरे गावचे सरपंचपद भूषविलेले असल्याने समाजसेवेचा वसा कायम आहे. कुटुंबाला वारकरी संप्रदायाचा संस्कार असल्याने कुटुंबातील सदस्यांनीही किडनी देण्यास संमती दिली. लहान बहिणीला जीवदान मिळून तिचे आयुष्य वाढले, याचा आनंद आहे." - रंजना सानप, माजी सरपंच, शिवरे