नाशिक : शेतमाल देशभरात विक्रीसाठी खासदार हेमंत गोडसे यांनी केंद्र शासनाकडे पाठपुरावा करून किसान रेल (kisan rail) सुरू केली होती. देवळाली कॅम्प रेल्वेस्थानकातून मुजफ्फरपूर (बिहार) मार्गावर पहिली किसान रेल सुरू झाली. सुरवातीला आठवड्यातून एक दिवस धावणाऱ्या रेल्वेला शेतकऱ्यांच्या वाढत्या प्रतिसादामुळे फेऱ्या वाढल्या. किसान रेल आठवड्यातून मंगळवारी, गुरुवारी आणि शनिवारी या तीन दिवशी सुरू झाली होती. पण आता किसान रेलबाबत एक महत्वाची माहिती समोर आली आहे.

‘किसान रेल’ आता आठवड्यातून चार दिवस

देशातील पहिली ‘किसान रेल’ (kisan rail) सुरू होण्यास सोमवारी (ता. ९) एक वर्ष पूर्ण झाले. वर्षभरात किसान रेल्वेद्वारे जिल्ह्यातून १६ हजार ५०० टन शेतीमाल परराज्यात पाठविण्यात आला, तर भुसावळ विभागातून किसान रेलला सुमारे १६ कोटींचा महसूल मिळाला. कृषिमाल वाहतुकीला मिळणाऱ्या प्रतिसादामुळे आठवड्यातून तीन दिवस धावणारी किसान रेल आता सोमवार (ता. १६)पासून आठवड्यातून चार दिवस धावणार आहे, अशी माहिती खासदार हेमंत गोडसे (hemant godase) यांनी दिली. वर्षभरात भुसावळ विभागातून २६ हजार टन शेतमाल परराज्यात किसान रेलमधून पाठविण्यात आला. यापोटी शासनाला नऊ कोटी १६ लाख रुपयांचा महसूल मिळाला.

शेतकऱ्यांच्या वाढत्या प्रतिसादामुळे फेऱ्या वाढल्या

देवळाली कॅम्प रेल्वेस्थानकातून पाच हजार टन शेतमालाची वाहतूक झाली. त्यातून शासनाला दोन कोटी रुपयांचा महसूल मिळाला. नाशिक रोड रेल्वेस्थानकावरून सहा हजार टन, तर मनमाड रेल्वेस्थानकावरून साडेपाच हजार टन शेतमाल परराज्यात पाठविण्यात आला. यातून शासनाला नाशिक आणि मनमाड येथून चार कोटी ५० लाख रुपयांचा महसूल मिळाला. शेतकऱ्यांकडून किसान रेलला मिळणारा प्रतिसाद पाहता किसान रेल आठवड्यातून तीनऐवजी चार दिवस सुरू करावी, अशी मागणी काही दिवसांपासून खासदार गोडसे करीत होते. गोडसे यांच्या प्रयत्नांना यश आले असून, येत्या सोमवारपासून किसान रेल आठवड्यातून चार दिवस धावणार आहे.