गिरणारे/गंगापूर (जि. नाशिक) : गिरणारे-साडगाव रस्त्यावर असलेल्या मळ्यातील राजाभाऊ थेटे यांच्या शेतातील शेतमजुरावर बिबट्याने जीवघेणा हल्ला केला. रविवारी (ता. १०) पहाटे ६.०० वाजता हा हल्ला बिबट्याने केल्याचे कळते. दरम्यान जखमी मजुरास उपचारासाठी जिल्हा रुग्णालयात दाखल करण्यात आले आहे.

नाशिकच्या पश्चिम पट्ट्यात सातत्याने बिबट्याच्या हल्ल्याच्या घटना घडत आहेत. आळंदी धरण, धागुर परिसरात गेल्या काही महिन्यांपूर्वी मजुरांच्या मुलीला बिबट्याने ठार केले होते, तर नाईकवाडी परिसरात शेतकऱ्यावर हल्ला करून जखमी केले होते. तसेच गिरणारे-साडगाव रस्त्यावर बिबट्याचा सातत्याने धुमाकूळ आहे. या परिसरात रात्री-बेरात्री शेतकरी साडगाव रस्त्यावर प्रवास करतांना घाबरतात, इतकी बिबट्याची दहशत आहे. रात्री बेरात्री शेतकरी शेतात काम ही करत नाहीत. शालेय मुलं रस्त्याने जाताना घाबरतात अशी परिस्थिती आहे. आजच्या शेतमजूरावरील हल्ल्याने तर नागरिक अधिकच भयभीत झाले आहेत. घटनेची खबर मिळताच वन विभागाने या भागात पिंजरा लावल्याचे कळते.

''गिरणारे, वाडगाव, दाबडगाव, साडगाव, नाईकवाडी परिसरात बिबट्याची दहशत कायम आहे. बिबट्याच्या भीतीने शेत वस्त्यांवर शेतकरी कुटुंबे जीव मुठीत धरून राहतात. रात्री-बेरात्री घरी येतांना भीती नेहमीचीच. वन विभागाने बिबट्याचा शोध घेऊन नागरिकांमधील भीती दूर केली पाहिजे. बिबट्याचे हल्ले व बिबट्या दिसल्याच्या घटना कायम आहेत. - पुंडलीकराव थेटे