मालेगाव (जि. नाशिक) : येथे झालेल्या पुण्य श्री शिवमहापुराण कथेला राज्यभरातील लाखो भाविकांनी हजेरी लावली. कथेमुळे उत्तर महाराष्ट्र, मराठवाडा, यासह असंख्य जिल्ह्यातील भाविकांनी येथे हजेरी लावली. नागरिकांना जाण्या येण्यासाठी लालपरी सोयीची ठरल्याने आठवड्यात मालेगाव आगाराला ११ लाख रुपयाचा निव्वळ नफा मिळाला. (Malegaon Shivpuran Katha 11 Lakh profit to Malegaon MSRTC Depot in 7 days nashik news)

मालेगाव येथे शिव महापुराण कथेला २३ डिसेंबरपासून सुरवात झाली होती. त्याअनुषंगाने येथील आगार व्यवस्थापकांनी भाविकांच्या सोयीसाठी २५ बसेस वाढविल्या होत्या. या बसेस धुळे, चाळीसगाव, मनमाड, शिर्डी, औरंगाबाद आदी मार्गावर धावत होत्या. येथील आगाराला रोज साडेचार लाख रुपयाचे उत्पन्न मिळत होते.

सात दिवसात येथील आगाराचा निव्वळ नफा अकरा लाख रुपये मिळाला आहे. सात दिवसात जादा बसेस २३ हजार किलो मीटरपेक्षा अधिक धावल्या. यातून लाखो प्रवाशांनी सुखरूप प्रवास केला. शिवपुराण कथेच्या शेवटच्या दिवशी येथील आगारात जनसागर उसळला होता.

हेही वाचा : जोखमीचे भान राखूनच करा SIP मध्ये गुंतवणूक

प्रवासी भाविकांसाठी अखेरच्या दिवशी धुळे, मनमाड, साक्री, दोंडाईचा, कळवण, येवला, लासलगाव, शिरपूर या आगारातून जादा बसेस मागविण्यात आल्या होत्या.

सुमारे २२५ बसेसमधून शिव भाविकांना प्रवास केला. धुळे, चाळीसगाव, नाशिक या मार्गावर जादा बसेस सोडण्यात आल्या होत्या. येथील बसस्थानकात पहिल्यांदाच एवढा मोठा जनसमुदाय उपस्थित होता. येथील जनसमुदायाला सुखरूप घरी पोचविण्यासाठी आगारातील प्रशासकीय कर्मचारी, चालक, वाहक आदींनी परिश्रम घेऊन परिस्थितीवर नियंत्रण आणले. येथील आगाराने केलेल्या नियोजनाबद्दल पालकमंत्री दादा भुसे यांनी समाधान व्यक्त केले.

"येथील आगारात पहिल्यांदा एवढी गर्दी उसळली होती. सर्व प्रवाशांना त्यांचा घरी सुखरूप पोहोचविण्यासाठी आगारातील सर्व कर्मचाऱ्यांनी अहोरात्र मेहनत घेतली. प्रवाशांच्या नियोजनासाठी पालकमंत्री दादा भुसे व वरीष्ठ अधिकाऱ्यांचे मार्गदर्शन मिळाले."

- किरण धनवटे, आगार व्यवस्थापक, मालेगाव.