नाशिक : इंदिरानगर परिसरातील रहिवासी गौरव व नेहा जगताप यांना आत्महत्येस प्रवृत्त केल्याप्रकरणी मुख्य संशयित युनूस मणियार याच्या अटकेनंतर न्यायालयाने त्यास चार दिवसांची पोलिस कोठडी सुनावली. तर, यापूर्वीच अटकेत मयूर बैरागी याला न्यायालयाने रविवारी (ता. २५) न्यायालयीन कोठडी सुनावल्याने मध्यवर्ती कारागृहात रवानगी केली. (Maniyar in police custody after 4 days Nashik Crime News)

हेही वाचा : Love Jihad: प्रेमाला धर्म आहे...?

कर्जबाजारी नवविवाहित जोडप्याकडे सावकारी पद्धतीने रकमेच्या वसुलीसाठी वारंवार धमकी देऊन तगादा लावणाऱ्या दोघा मुख्य संशयितांना दोन दिवसांच्या अंतराने इंदिरानगर पोलिसांनी अटक केली. मृत गौरव जगताप व त्याची पत्नी नेहा जगताप यांनी डायरीत लिहिलेल्या सुसाईड नोटमधील मजकुराच्या आधारे इंदिरानगर पोलिसांनी संशयित युनूस मणियार व बैरागीला अटक केली आहे.

गौरव जितेंद्र जगताप (२९) याच्यासह पत्नी नेहा गौरव जगताप (२३) यांनी गेल्या १८ तारखेला घरातील हॉलमध्ये दोरीचा फास बनवून संगनमताने गळफास घेतला होता. या प्रकरणी बुधवार (ता.२१) मयूर बैरागी यास पोलिसांनी सातपुरमधील घरातून अटक केली होती. तर, शनिवार (ता.२४ ) दुपारच्या सुमारास वडाळागाव रस्त्यावर सापळा रचून संशयित मणियार (३५, रा. भारतनगर, वडाळारोड) यास अटक केली. मणियारला चार दिवसांची पोलिस कोठडी मिळाल्याने पोलिसांना मणियारकडे सखोल तपास करण्यास वेळ मिळणार आहे.