मनमाड (जि. नाशिक) : देशातील मध्यवर्ती रेल्वे जंक्शन व सतत प्रवाशी आणि गाड्यांची वाहतूक वर्दळ असणाऱ्या मनमाड रेल्वे स्थानकाची गुरूवारी (ता. १६) नाशिक ग्रामीणच्या मालेगाव येथील बॉम्ब शोधक पथकातील ‘अॅना’ या श्‍वानाने कसून तपासणी केली. सुरक्षेच्या दृष्टीने रेल्वे स्थानकाची सतत कसून तपासणी केली जात आहे. तर रेल्वे स्थानकात कडक बंदोबस्त तैनात करण्यात आला आहे, अशी माहिती लोहमार्ग निरिक्षक शरद जोगदंड यांनी दिली. ञ

मनमाड लोहमार्ग पोलिसांतर्फे या मोहिमेचे आयोजन करण्यात आले. कोरोनाच्या पार्श्‍वभूमीवर अनेक बंद असलेल्या रेल्वे गाड्या टप्प्याटप्प्याने सुरू झाल्या आहेत. निर्बंध शिथील झाल्याने प्रवासी संख्या वाढू लागली. तसेच, गणेशोत्सव आणि रविवारी होणारा गणेश विसर्जण सोहळा बघता देशात घातपाताचा कट रचणाऱ्या दहशतवाद्यांना दिल्ली पोलिसांनी अटक केली आहे. त्यामुळे महत्वाच्या रेल्वे स्थानकात दक्षतेचा इशारा देण्यात आला आहे. त्यामुळे मालेगाव ग्रामीणच्या बीडीएस पथकातील अॅना या श्‍वानाची रेल्वे स्थानकात एंन्ट्री होताच प्रवाशांना धडकी भरली.

अॅनाने रेल्वे स्थानकातील सर्व फलाटावरील प्रवासी सामान, रेल्वेची विविध कार्यलये, द्वितीय श्रेणी विश्रांती गृह, नवा पादचारी पूल, पार्सल कार्यालय, तिकीट बुकिंग आदी परिसराची कसून तपासणी केली. त्यानुसार सबकुछ ओके असल्याचा निर्वाळा दिला. लोहमार्ग पोलिस निरिक्षक शरद जोगदंड यांच्या नेतृत्वाखाली उपनिरिक्षक मधुकर लोखंडे, राजेंद्र पाटील, एन. एस. कातोरे, महेंद्र पाटील, संतोष मार्कड, नितीन मानकर, एस. डी. भोरकड, एस. एस. दांडगे, जी. पी. आहिरे, बी. एम. साबळे, एस. सी. आठवले आदी या मोहिमेत सहभागी झाले होते.