नाशिक / चांदोरी : कोरोना विषाणूचा प्रादुर्भांव रोखण्यासाठी महाराष्ट्र राज्यात साथ रोग प्रतिबंधक अधिनियम 1897 च्या अंमलबजावणीस १३ मार्चपासून सुरुवात करण्यात आली आहे, त्यामुळे जनजीवन विस्कळीत झाले आहे. सर्वात मोठा फटका अर्थव्यवस्थेला बसला आहे. या आजाराने अनेकांचा रोजगार हिरावला आहे. व्यावसायिक आणि हातावर काम करणार्‍यांचे मोठे आर्थिक नुकसान होत आहे. 

ओंब्यांतून दाणे काढून आपल्या पोटापाण्याची सोय

कोरोनाचा वाढता प्रादुर्भाव रोखण्यासाठी आधी मुख्यमंत्री उद्धव ठाकरे आणि त्यानंतर पंतप्रधान नरेंद्र मोदी यांनी लॉकडाउनची घोषणा केली. त्यामुळे आठ दिवसांपासून गावासह परिसरातील सर्वच दुकाने आणि काम बंद असून अनेकांचा रोजगार हिरावला आहे. यंदा पाऊस चांगला झाल्याने गव्हासह इतर सर्वच पिकं बहरून आले. चांदोरीसह परिसरात गव्हाचे पीक दमदार झाले. पूर्वीच्या काही वर्षांपूर्वी हाताने सोंगणी केली जात असल्याने रोजगार ही मिळत होता आणि जनावरांना भुसाही. सध्या यंत्राच्या वापर सुरू झाल्याने आणि मजूरही मिळत नसल्याने बहुतांश शेतकरी हे हार्वेस्टरच्या साहाय्याने सोंगणी करतात. हे करतानाच काही गव्हाच्या ओंब्या खाली पडतात ज्याला सरवा म्हटलं जातं. कधी - कधी शेतकरी सरवा वेचतात तर काही शेतकरी तसाच ठेवून गुरे बांधतात तर काही जाळून टाकतात. मात्र मजूर लोक हाच सरवा वेचून, त्या ओंब्यांतून दाणे काढून आपल्या पोटापाण्याची सोय करताना दिसत आहेत. 

शेतकऱ्यांवर आर्थिक कुऱ्हाड

कोरोनामुळे देशातील सर्वच आर्थिक व्यवहार जवळपास ठप्प झाले आहेत. ज्याचा सर्वाधिक परिणाम हा शेतकऱ्यांवर झालेला पाहायला मिळत आहे. त्यामुळे काही दिवसांपूर्वीच अवकाळी पावसाने नुकसान सोसून उभं राहणाऱ्या शेतकऱ्याचं कोरोनाने कंबरडंच मोडून टाकलं आहे. त्यामुळे आता शेतकऱ्यांना सरकारने मदत करावी अशी मागणी करण्यात येत आहे.