नाशिक : ‘‘ कोणत्याही ब्राह्मण समाजात संभाजी, शिवाजी अशी नावे ठेवत नाही. मनोहर कुलकर्णी हे काहीही बोलतात, आंबा खाल्ल्यावर म्हणे अपत्य होते! असे झाले असते तर मग मेडिकल कॉलेजची काय गरज होती? इतिहासावर काहीही बोलणाऱ्यांना आपण लगाम घातला पाहिजे.

शासन आपल्या दारी यातील सगळ्या योजनांचा लाभ घेतला पाहिजे. निवडणुकीत तुम्हाला काय करायचे ते करा,’’ असे प्रतिपादन राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी केले. ते ‘मराठा विद्या प्रसारक मंडळा’च्या मखमलाबाद येथील शैक्षणिक संकुलात समाज दिनाच्या कार्यक्रमात बोलत होते.

भुजबळ म्हणाले, ‘‘ फुले , शाहू , आंबेडकर यांनी एका समाजासाठी काम केलेले नाही, त्यांनी सर्वांसाठी काम केले. आज जे आपण शिक्षण घेत आहोत त्यांच्यामुळे घेत आहोत. तसेच मी देखील त्यांच्यामुळेच शिकलो. त्यामुळे ते आपले देव आहेत.

आपण ज्यांचे फोटो लावतो त्यांनी किती शाळा काढल्या? त्यांनी कुणाला शिकवले? शिक्षणाच्या प्रश्नावर सर्वांनी जातिभेद, मतभेद दूर करत एकत्र येऊन काम करण्याची आवश्यकता आहे. माळी समाजात अनेक जाती पोटजाती आहेत. ते सुद्धा एकत्र येत नाही. जातीपातीचे राजकारण सोडून आपण एकत्र आलो पाहिजे.’’