नाशिक : मराठी नववर्ष गुढीपाडव्याच्या सांस्कृतिक कार्यक्रमांच्या काही संस्थांच्या कार्यक्रमांना परवानगी देण्याच्या वादात बुधवारी (ता. ३०) पालकमंत्री छगन भुजबळ (Chhagan Bhujbal) यांनी मध्यस्थी केली. पोलिस आयुक्त दीपक पांडे (CP Deepak Pandey) व नववर्ष स्वागत समिती अध्यक्ष प्रफुल्ल संचेती यांच्यातील वादानंतर पोलिस आयुक्तांसोबत बैठकीनंतर भुजबळांनी सगळ्या कार्यक्रमांना परवानगी मिळेल, असे स्पष्ट केले. बुधवारी श्री. भुजबळ यांच्या निवासस्थानी बैठक होताच गुढीपाडव्यानिमित्त पोलिसांकडे आलेल्या शहरातील प्राप्त अर्जानुसार कार्यक्रमांना पोलिस परवानगी दिल्याचे भुजबळ यांना सांगितले.

सार्वजनिक ठिकाणी मोठ्या प्रमाणात कार्यक्रमांचे नियोजन करणाऱ्या आयोजकांना चर्चेस बोलविले तरी ते येत नाही. चर्चा न करताच परवानगी मागत आहेत. ते अजिबात सयुक्तिक नसल्याचे पांडे यांनी सांगितले. सार्वजनिक ठिकाणी कार्यक्रम आयोजित करताना नाशिक शहर पोलिस आयोजकांना विविध कागदपत्रांची मागणी करतात. त्यातून आयोजक आणि पोलिसांमध्ये वाद होत आहेत. शहरातील विविध कार्यक्रमांना पोलिस परवानगी देताना टाळाटाळ केली जात असल्याचा आयोजकांचा आरोप होता. गुढीपाडव्यानिमित्त नववर्ष स्वागत यात्रा समितीने पाच दिवसीय सांस्कृतिक कार्यक्रमाच्या परवानगीसाठी अडवणूक होत असल्याचा आरोप केला होता. श्री. भुजबळ यांनी बुधवारी (ता. ३०) भुजबळ फार्मवर बैठकीत नववर्ष स्वागत कार्यक्रमांना पोलिस परवानगी देण्याबाबत चर्चा झाली. त्यानंतर संयुक्तपणे पत्रकारांशी बोलताना पोलिस आयुक्तांनी परवानगीसाठी येणाऱ्या सर्व अर्जदार व्यक्ती व संस्थांना परवानगी देणार आहे, असे स्पष्ट केले.