नाशिक : शाळा सुटल्यानंतर आश्रमात न परतलेल्या ९ वर्षीय मुलीची बेपत्ता झाल्याची तक्रार दाखल होताच सरकारवाडा पोलिसांनी तासाभरात चिमुरडीला शोधून आश्रमाच्या सुपूर्द केले. पोलिसांनी घेतलेल्या तत्परतेचे यामुळे कौतुक होत आहे. (Minor girl found within an hour Nashik Latest marathi news)

घारपुरे घाटावरील आधाराश्रमात राहणारी नऊ वर्षांची मुलगी एमजी रोड परिसरातील शाळेत शिकण्यासाठी जाते. शनिवारी (ता. ६) ही चिमुरडी नेहमीप्रमाणे शाळेत गेली. परंतु शाळेतील ती वेळेत परतली नाही. त्यामुळे आश्रमाच्या तृप्ती मकवाना यांनी सरकारवाडा पोलिस ठाणे गाठून चिमुरडी बेपत्ता झाल्याची तक्रार दिली.

या तक्रारीमुळे सरकारवाडा पोलिसांनी एक पथक तयार करण्यात येऊन शोध मोहीम सुरू केली. दरम्यान, पोलिस उपनिरीक्षक प्रकाश नेमाने यांना एका बेपत्ता मुलगी सापडल्याची खबर मिळाली. पोलिसांनी तत्काळ गोदाघाटावरील दहिपूल गाठला. त्याठिकाणी जागरूक नागरिक विकास शिंदे, सतीश तुपे यांच्याजवळ एक बेपत्ता मुलगी होती.

आश्रमाची बेपत्ता झालेलीच ती चिमुकली असल्याने पोलिसांची शोध मोहिमेला यश आले. सदर मुलीला ताब्यात घेऊन पोलिसांनी तिला आश्रमाच्या तृप्ती मकवाना यांच्या हवाली केले. सदरील मोहीम पोलिस शिपाई नाजीम शेख, महाले यांनी बजावली. तासाभरामध्ये बेपत्ता मुलीचा शोध लावल्याने पोलिसांच्या या कामगिरीने कौतुक होते आहे.