नाशिक : तीन वर्षापूर्वी अपहरण झालेल्या अल्पवयीन मुलीस हुडकून काढण्यात शहर पोलिसांना यश आले आहे. अनैतिक मानवी वाहतूक प्रतिबंध कक्षाने मुलीसह तिच्या प्रियकरास कोपरगाव (ता. इगतपुरी) येथे ताब्यात घेतले असून, दोघांना इंदिरानगर पोलिसांच्या स्वाधीन करण्यात आले. (Missing girl found for 3 years Nashik News)

हेही वाचा : सूर्यकुमार...भारतीय क्रिकेट मधला 'लंबी रेस का...'

इंदिरानगर पोलिस ठाणे हद्दीत राहणारी मुलगी २०२० मध्ये बेपत्ता झाली होती. तिला कोणी तरी फूस लावून पळवून नेल्याचा अंदाज वर्तविण्यात आल्याने अपहरणाचा गुन्हा दाखल करण्यात आला होता.

पोलिस अपहृत मुला- मुलींचा शोध घेत असताना अनैतिक मानवी वाहतूक कक्षाचे उपनिरीक्षक सुनील माळी यांना बुधवारी (ता. ११) मिळालेल्या माहितीच्या आधारे ही कारवाई करण्यात आली. वरिष्ठांच्या मार्गदर्शनाखाली पथकाने कोपरगाव गाठून मुलीसह तिला पळवून नेणाऱ्या प्रियकरास ताब्यात घेतले असून, दोघांना इंदिरानगर पोलिसाच्या स्वाधीन करण्यात आले आहे.

ही कारवाई उपायुक्त प्रशांत बच्छाव, सहाय्यक आयुक्त वसंत मोरे यांच्या मार्गदर्शनाखाली मध्यवर्ती गुन्हे शाखेचे वरिष्ठ निरीक्षक डॉ. आँचल मुदगल, सहाय्यक निरीक्षक धर्मराज बांगर, उपनिरीक्षक माणिक गायकर, उपनिरीक्षक सुनील माळी, हवालदार शेरखान पठाण, आनंदा काळे, पोलिस नाईक गणेश वाघ, वैशाली घरटे आदींच्या पथकाने केली.