मालेगाव (जि. नाशिक) : राज्य शासनाच्या (state government) नगरविकास विभागाने सोमवारी मुख्याधिकारी संवर्गातील गट ‘अ’ व गट ‘ब’ मधील राज्यातील ५३ अधिकाऱ्यांना पदोन्नती दिली. या पदोन्नतीमुळे मालेगाव महानगरपालिकेला (MMC) दोन उपायुक्त नव्याने लाभले आहेत. महापालिकेत () सुमारे वर्षभराच्या प्रतीक्षेनंतर शासन नियुक्त दोन उपायुक्त (Deputy Commissioner) नियुक्त झाल्याने कामकाजात सुसूत्रता येण्यास मदत होईल.

शहरात नव्याने नियुक्त झालेल्या अधिकाऱ्यांमध्ये पुणे महापालिकेचे (PMC) सहाय्यक आयुक्त (Assistant Commissioner) सुहास जगताप यांची पदोन्नतीने मालेगाव महापालिकेत उपायुक्तपदी नेमणूक झाली आहे. तळेगाव- दाभाडे नगरपरिषदेचे मुख्याधिकारी सतीश दिघे यांनाही येथील महापालिकेत पदोन्नतीने (Promotion) उपायुक्त म्हणून नियुक्त करण्यात आले आहे. दरम्यान, गेल्या चार महिन्यांपूर्वीच महापालिकेत सहाय्यक आयुक्त म्हणून नेमणूक झालेल्या हेमलता डगळे यांची नागपूर महापालिकेत उपायुक्त पदावर पदोन्नतीने नियुक्ती झाली आहे. यामुळे शासननियुक्त दोन उपायुक्त लाभले असले तरी सहाय्यक आयुक्तांची दोन पदे मात्र अद्यापही रिक्त आहेत. सध्या महानगरपालिका कामाची धुरा प्रामुख्याने स्थानिक अधिकाऱ्यांवर आहे. बहुसंख्य अधिकाऱ्यांकडे कामाचा अतिरिक्त भार आहे. नवनियुक्त उपायुक्त पदभार केव्हा स्विकारणार याविषयी उत्सुकता आहे.