नाशिक : महापालिका निवडणुका जवळ येत असताना राजकीय पक्षाकडून जोरदार तयारी सुरू झाली आहे. प्राथमिक टप्प्यात संघटना बळकटीवर लक्ष देत असताना मागील काळात सत्तेवर असलेल्या महाराष्ट्र नवनिर्माण सेनेने किमान किंगमेकर ठरण्यासाठी दुसऱ्या, तिसऱ्या स्थानावर राहिलेल्या उमेदवारांच्या प्रभागांवर लक्ष केंद्रित केले आहे. एक सदस्यीय प्रभाग झाल्यास मनसेला अधिक नगरसेवक निवडून येण्याची शक्यता वाटत असल्याने त्या दृष्टीने तयारी सुरू आहे.

सन २०१२ मध्ये महाराष्ट्रात मनसेच्या रूपाने प्रथमच नाशिक महापालिकेत सत्ता आली. पाच वर्षात सामाजिक दायित्वाच्या निधीतून अनेक प्रकल्प पूर्णत्वास गेल्यानंतर सन २०१७ च्या निवडणुकीला सामोरे जाताना मात्र नाशिककरांनी मोदी लाटेत सहभागी होण्याचा निर्णय घेत सत्तेचा सुकाणू भाजपच्या हाती दिला. सत्तेची साडे चार वर्षे उलटत असताना सन २०२२ च्या निवडणुकीचे वेध राजकीय पक्षांना लागले आहे. त्या दृष्टीने मनसेनेही तयारी सुरू केली आहे. मनसे अध्यक्ष राज ठाकरे जुलै महिन्यात येऊन गेले, तर अमित ठाकरे दोन दिवस नाशिकमध्ये ठाण मांडून होते. नाशिकच्या मैदानावरील फुटबॉल व बॅडमिंटन हे त्यांचे खेळ चर्चेत आले. पुढील महापालिका निवडणुकीत भाजप सोबत युती होईल की नाही, याबाबत अद्याप निश्‍चित नसले तरी त्याचा विचार न करता संघटनात्मक बांधणी बरोबरच निवडणुकीची खेळपट्टी तयार करण्याचे काम हाती घेण्यात आले आहे. त्यामध्ये मागील निवडणुकीत दुसऱ्या व तिसऱ्या क्रमांकावर असलेल्या उमेदवार व प्रभागांकडे लक्ष केंद्रित करण्यात आले आहे. प्रभाग क्रमांक पाच ब मधून नंदिनी बोडके, प्रभाग सहा ड मधून अशोक मुर्तडक, अकरा ब व क मधून योगेश शेवरे व सलीम शेख, तेरा क मधून ॲड. वैशाली भोसले निवडून आले. या पाच प्रभागांव्यतिरिक्त मतदानाचा टक्का वाढविणाऱ्या प्रभाग केंद्रित करण्यात आले आहे.

किंगमेकर ठरण्याची आशा

सन २०१७ च्या निवडणुकीत दुसऱ्या स्थानावर राहिलेल्या मनसेच्या नगरसेवकांमध्ये पंचवटी विभागातील प्रभाग क्रमांक पाचमध्ये उल्हास धनवटे, प्रभाग क्रमांक ६ अ मध्ये चित्रा जगन्नाथ तांदळे, प्रभाग क्रमांक ६ क मध्ये छाया काकड, प्रभाग क्रमांक १० ब मध्ये कलावती इंद्रभान साळवे, प्रभाग क्रमांक १० ड मध्ये अशोक शंकर नागरे, प्रभाग क्रमांक २५ ड मध्ये अनिल मटाले, प्रभाग क्रमांक २७ अ मध्ये प्रशांत खरात, प्रभाग क्रमांक ३० अ मध्ये नचिकेत धाकराव हे दुसऱ्या स्थानावर होते. पाच उमेदवारांचा दुसरा क्रमांक दोनशे ते अडीचशे मतांनी हुकला आहे. त्यामुळे आगामी निवडणुकीत उतरताना या भागांकडे लक्ष केंद्रित करण्यात आले आहे.