नांदगाव (जि. नाशिक) : जन्मदात्या आईनेच आपल्या मनोरुग्ण मुलाच्या खुनाची सुपारी देऊन त्याची निर्घृण हत्या घडवून आणल्याची धक्कादायक घटना तालुक्यातील ढेकू येथे घडली. जनार्दन पेंढारे (वय ४७) असे हत्या झालेल्या तरुणाचे नाव आहे. जनार्दन हा मनोरुग्णासारखा वागून नेहमी आई-वडिलांना मारहाण करीत असे. त्याच्या त्रासाला कंटाळून वृद्ध आई जनाबाई हिने टोकाचे पाऊल उचलल्याचे पोलिस सूत्रांनी सांगितले. या प्रकरणी पोलिसांनी दोन्ही संशयितांविरुद्ध खुनाचा गुन्हा दाखल करून त्यांना अटक केली आहे. (Crime news)

नांदगाव तालुक्यातील ढेकू येथे जनाबाई पेंढारे या वृद्धा पती अप्पा पेंढारे व मुलगा जनार्दन यांच्यासोबत राहतात. मनोरुग्ण असलेला जनार्दन हा वृद्ध आई- वडिलांना जबर मारहाण करीत असायचा. शिवाय त्याच्या विक्षिप्तपणाचा गावकऱ्यांनाही नेहमीच त्रास होत असे. या त्रासाला कंटाळून अखेर आईनेच जनार्दनचा काटा काढण्याचा निर्णय घेतला. तिने गावातीलच समाधान दौलत भड याला जनार्दनला ठार मारण्यासाठी पंधरा हजार रुपयांची सुपारी दिली. जनार्दन घरात झोपलेला असताना समाधानने लोखंडी पहारीने त्याच्या डोक्यात वार करून ठार मारले. जनार्दनचा मृत्यू झाल्याची खात्री पटल्यानंतर त्याचा मृतदेह प्लॅस्टिक गोणीमध्ये भरून परिसरातील साईनाथ राठोड यांच्या शेतातील विहिरीमध्ये फेकून दिला. मात्र, गोणी मृतदेहासह पाण्यावर तरंगून आल्याने शेतकऱ्याच्या ही बाब लक्षात आली. (Latest marathi news)

पोलिस पाटील विजय चव्हाण यांनी पोलिसांना माहिती दिली. पोलिस उपअधीक्षक समीरसिंग साळवे यांच्यासह इतर अधिकारी घटनास्थळी दाखल झाले. त्यांनी गोणीतील मृतदेह बाहेर काढून पंचनामा केला. त्यानंतर मृतदेह विच्छेदनासाठी पाठविण्यात आला. मृतदेह गावातील जनार्दन पेंढारे याचा असल्याचे निष्पन्न झाल्यानंतर पोलिसांनी तपासाची चक्रे फिरवली असता जन्मदात्या आईनेच मुलाची सुपारी देऊन हत्या घडवून आणल्याची माहिती समोर आली. या घटनेने पोलिसांना देखील आश्‍चर्याचा धक्का बसला आहे.