सिडको (नाशिक) : गेल्या काही दिवसांपासून सिडकोतील उड्डाणपुलावरून (Flyover) राजकारण तापले असताना नाशिक दौऱ्यावर असलेले शिवसेना नेते व खासदार संजय राऊत (MP Sanjay Raut) सिडकोवासीयांच्या जिव्हाळ्याच्या प्रश्नावर म्हणजे उड्डाणपुलाबाबत आता काय बोलतात, याकडे संपूर्ण सिडकोवासीय व नाशिककरांचे लक्ष लागले आहे. (MP Sanjay Raut will arrive in Nashik today regarding the flyover)

काही वर्षांपूर्वी सर्वसामान्य व कामगारांना परवडणारा अल्पदरातील सिडकोचा गृहप्रकल्प झाला. त्यानंतर प्रथमच सिडकोच्या विकासात भर टाकणारा उड्डाणपूल बनू पाहत आहे. असे असताना महापौरांनी सदर उड्डाणपूल रद्द व्हावा, अशी मागणी मनपा आयुक्तांकडे लेखी पत्राद्वारे केली आहे. तर दुसरीकडे उड्डाणपूल रद्द झाल्यास राजकारणातून संन्यास घेईन, असे प्रतिआव्हान शिवसेना महानगरप्रमुख यांनी महापौरांना दिले आहे. दुसरीकडे उड्डाणपूल व्हावा, याकरिता सिडकोतील शिवसेना-भाजप, काँग्रेस-राष्ट्रवादी व मनसे हे राजकीय पक्ष प्रथमच ‘हम सब एक है’ चा नारा देताना दिसून येत आहे. असे असताना उत्तर महाराष्ट्र दौऱ्यावर असलेले शिवसेनेना नेते संजय राऊत आज रविवारी (ता. १३) नाशिक दौऱ्यावर येत असल्याने आता ते सिडकोवासीयांचा जिव्हाळ्याचा प्रश्‍न बनू पाहणाऱ्या उड्डाणपुलासंदर्भात काय भाष्य करतात, याकडे लक्ष लागले आहे.

शिवसेनेसाठी ‘टर्निंग पॉइंट’

गेल्या काही पंचवार्षिक निवडणुकीपासून सिडकोमध्ये सर्वाधिक नगरसेवक हे शिवसेनेचे निवडून येत आहेत. लोकसभा निवडणुकीवेळीदेखील याच भागातून सर्वाधिक मते शिवसेना पक्षाच्या खासदारांना पडलेले आहे. त्यामुळे सिडको म्हणजे शिवसेनेचा जणू काही बालेकिल्लाच आहे, हे सर्वश्रुत झाले आहे. त्यामुळे येणाऱ्या नाशिक मनपा निवडणुकीत सिडकोत होणारा उड्डाणपूल शिवसेनेसाठी ‘टर्निंग पॉइंट’ ठरेल एवढे मात्र नक्की! (MP Sanjay Raut will arrive in Nashik today regarding the flyover)