नाशिक : कोरोनाच्या (CoronaVirus) दुसऱ्या लाटेमध्ये नागरिकांनी संयम, शिस्त व धैर्य दाखविल्याने कोरोना संसर्गाचा फैलाव रोखण्यात यश आले. हेच धैर्य आता तिसऱ्या लाटेत दाखविण्याची गरज आहे. या लाटेत लहान मुलांना जपा, वाढदिवसाच्या कार्यक्रमांना उत्सवाचे स्वरूप न देता कौटुंबिक पद्धतीने साजरा करण्याचे आवाहन महापालिका आयुक्त कैलास जाधव (Kailas Jadhav) यांनी केले. Municipal Commissioner appeals to take care of children's health in the third wave of Corona

संभावित कोविड तिसऱ्या लाटेच्या पार्श्‍वभूमीवर आयुक्त जाधव यांनी नाशिककरांशी फेसबुक लाइव्हच्या माध्यमातून संवाद साधला. या वेळी ते बोलत होते. ते म्हणाले, की साथीच्या आजारांची लक्षणे आढळून आल्यास महापालिकेच्या फिव्हर क्लिनिकमध्ये जाऊन तपासणी करून घ्यावी. तिसऱ्या लाटेचा सामना करण्यासाठी प्रशासनाला सहकार्य करावे, अनावश्‍यक फिरणे टाळावे, तिसऱ्या लाटेत लहान मुलांना संसर्ग होण्याची शक्यता असल्याने त्यांचे आरोग्य जपण्याचे महत्त्वाचे काम पालकांना करावे लागणार आहे. अनावश्‍यक घराबाहेर जाऊ नका, लहान मुलांना बाहेर फिरू देऊ नका, वाढदिवसाचे कार्यक्रम कौटुंबिक वातावरणात साजरे करावे, घरगुती कार्यक्रमांना उत्सवाचे स्वरूप देऊ नका.

प्रशासनाला सहकार्याची गरज

कोरोनाच्या तिसऱ्या लाटेचा सामना करण्यासाठी महापालिकेची यंत्रणा सज्ज आहे. प्रशासनाकडून युद्धपातळीवर तयारी करताना नागरिकांच्या सहकार्याचीही गरज असल्याचे आयुक्त जाधव यांनी सांगितले. पोस्ट कोविडमध्ये वेगवेगळे आजार येत असून, सातत्याने त्याचे प्रमाण वाढत आहे. कोरोना उपचारातून रुग्ण बरा झाल्यानंतर म्युकरमायकोसिसचे नवे संकट उभे राहिले आहे. त्यामुळे नागरिकांनी स्वतःच्या तब्येतीची काळजी घ्यावी. साखरेचे प्रमाण अधिक असलेल्या नागरिकांनी अधिक काळजी घ्यावी. टास्क फोर्सच्या नियमांचे पालन करावे. कोरोना त्रिसूत्रीचे पालन करावे. कमीत कमी नागरिकांना त्रास होईल, यासाठी एकत्र येऊन सर्वांनी प्रयत्न करावेत.

कोरोनाच्या दुसऱ्या लाटेमध्ये नाशिककरांनी शिस्त, धैर्य राखले. हीच अपेक्षा संभावित तिसऱ्या लाटेमध्ये आहे. तिसऱ्या लाटेचा सामना करण्यासाठी प्रशासन सज्ज आहेच, परंतु नागरिकांचीही साथ हवी आहे.
- कैलास जाधव, आयुक्त, महापालिका