नाशिक : नाशिक जिल्हा मराठा विद्याप्रसारक समाज संस्‍थेच्‍या पंचवार्षिक निवडणुकीकरिता निवडणूक कार्यक्रम जाहीर झाला असून, शुक्रवार (ता. ५)पासून उमेदवारी अर्ज उपलब्‍ध होणार आहेत.

२८ ऑगस्‍टला मतदान, तर २९ ऑगस्‍टला मतमोजणी व निकाल जाहीर केला जाणार असल्‍याची माहिती सूत्रांकडून मिळते आहे. (MVP election process may start from Friday nashik Latest Marathi News)

जिल्ह्यातील सर्वांत मोठी शैक्षणिक संस्‍था असलेल्‍या मविप्र संस्‍थेच्‍या कार्यकारिणी मंडळाची मुदत ऑगस्‍टमध्ये संपते आहे. २०२२ ते २०२७ या कालावधीसाठी पंचवार्षिक निवडणूक होत आहे. या निवडणुकीकरिता निवडणूक कार्यक्रम निश्‍चित झाल्‍याची माहिती सूत्रांकडून मिळते आहे.

शुक्रवार (ता. ५)पासून उमेदवारी अर्जाची विक्री केली जाणार आहे. मतदारयाद्या, घटना व निवडणूक नियमावली निवडणूक मंडळ कार्यालयात विक्रीसाठी उपलब्‍ध करून दिली जाणार असल्‍याची माहिती मिळते आहे. १५ ऑगस्‍टची सुटी वगळता इतर सुट्यांच्‍या दिवशी निवडणूक कार्यालयातील कामकाज सुरू राहणार असल्‍याची माहिती मिळते आहे.

मविप्र निवडणुकीसाठी एक सदस्यीय लवादाची नियुक्ती करण्यात आली आहे. त्‍यानुसार अॅड. शिवाजीराव गोविंदराव खालकर यांना संस्थेतर्फे नेमणूकपत्र देण्यात आले.

सरचिटणीस श्रीमती नीलिमाताई पवार, सभापती माणिकराव बोरस्ते व कार्यकारी मंडळ उपस्थित होते. निवडणूक मंडळाचे अध्यक्ष ॲड. भास्‍करराव चौरे, सचिव डॉ. डी. डी. काजळे हे काम सांभाळणार आहेत. सदस्‍य म्‍हणून ॲड. रामदास खांदवे, ॲड. महेश पाटील काम पाहतील.

...असा आहे संभाव्‍य कार्यक्रम

उमेदवारी अर्ज उपलब्‍धता ----------------- ५ ते ११ ऑगस्‍ट

उमेदवारी अर्ज स्वीकारण्याची मुदत ----- ७ ते ११ ऑगस्‍ट

लवादाकडे अपिलाची मुदत ---------------- १३ व १४ ऑगस्‍ट

अपिलावर निर्णय देण्याची मुदत ---------- १६ ऑगस्‍ट

पात्र उमेदवारांची यादी प्रसिद्ध होणार --- १६ ऑगस्‍ट

उमेदवारी मागे घेण्याची मुदत ------------- १९ ऑगस्‍ट

उमेदवारांची अंतिम यादी प्रसिद्धी ----------- १९ ऑगस्‍ट

उमेदवारांना निवडणूक चिन्‍ह वाटप ------ १९ ऑगस्‍ट

मतदान ---------------------------- २८ ऑगस्‍ट

मतमोजणी व निकाल ----------------- २९ ऑगस्‍ट