Nashik News : निफाड तालुक्यातील एका ५८ वर्षीय व्यक्तीचा स्वाइन फ्लूमुळे मृत्यू झाल्याने जिल्ह्यातील स्वाइन फ्लूंच्या बळींचा आकडा दहापर्यंत पोचला आहे. मागील महिन्यापासून स्वाईन फ्लूचा प्रादुर्भाव वाढू लागला आहे. उपचारासाठी शहरी भागात रुग्ण दाखल होत असल्याने महापालिका अलर्ट मोडमध्ये आली आहे. जानेवारी ते एप्रिल या चार महिन्यात शहरात स्वाइन फ्लूचे २३ रुग्ण आढळले होते. एप्रिल महिन्यात जेल रोड येथील एका डॉक्टरचा स्वाइन फ्लूमुळे मृत्यू झाला. (10 persons died in swine flu in niphad district )

मे महिन्यात सिन्नरमधील दातली गाव येथील एका ६३ वर्षीय महिलेला व मालेगाव येथील ६५ वर्षी व्यक्ती तसेच २९ वर्षीय महिलेचा मृत्यू झाला. निफाड येथील ६८ वर्षीय महिला व कोपरगाव येथील ६५ वर्षीय महिला व जेल रोड भागातील एका सेवानिवृत्त एअर फोर्स कर्मचाऱ्याचा स्वाइन फ्लूमुळे मृत्यू झाला. दिंडोरीतील ४२ वर्षीय महिला व चांदवड तालुक्यातील तिसगाव भागातील एका पन्नास वर्षे व्यक्तीचा स्वाइन फ्लूमुळे मृत्यू झाला.

आता निफाड तालुक्यातील शिरवाडे येथील एका ५८ वर्षीय व्यक्तीचा स्वाइन फ्लूमुळे मृत्यू झाला आहे. नाशिकमध्ये एका खासगी रुग्णालयात उपचार सुरू होते. प्रकृती अधिक खालावल्याने २० जूनला मृत्यू झाला. मृत रुग्णाचा स्वाइन फ्लूचा अहवाल पॉझिटिव्ह आला आहे. दरम्यान जिल्ह्यात ६० जणांना लागण झाल्याचे स्पष्ट झाले आहे.

जून महिन्यात मागील २५ दिवसात स्वाइन फ्लूचे पाच तर ग्रामीण भागात एक नवीन रुग्ण आढळला. नाशिक शहरातील स्वाइन फ्लू बाधितांचा आकडा ३५ वर पोचला आहे. दरम्यान नाशिक शहरात स्वाइन फ्लूची परिस्थिती नियंत्रणात असून नागरिकांनी घाबरू नये, असे आवाहन मुख्य आरोग्य व वैद्यकीय अधिकारी डॉ. तानाजी चव्हाण यांनी केले.