सातपूर : चुंचाळे शिवारातील भोर टाउनशिप परिसरातील शेततळ्यात बुडून दोन सातवर्षीय मुलांचा मृत्यू झाल्याची घटना रविवारी (ता. २२) दुपारी साडेतीनच्या सुमारास घडली. या घटनेत अशरफ अक्रमखान व इर्शाद शाह यांचा मृत्यू झाला. या घटनेने परिसरात हळहळ व्यक्त होत आहे. सातपूर-अंबड लिंक रोडवरील अंबिका संकुल परिसरात राहणारी चार समवयस्क मुले दुपारी खेळण्यासाठी घराबाहेर पडली होती. खेळता खेळता ती भोर टाउनशिप परिसरातील सुमारे २० एकरच्या क्षेत्रात तयार करण्यात आलेल्या १०० बाय २०० मीटर लांबी असलेल्या शेततळ्याजवळ पोहोचली. ( 2 children died after drowning in farm )

चौघांपैकी अशरफ व इर्शाद यांनी तळ्याच्या पाठीमागील बाजूने तारेच्या कंपाउंडमधून प्रवेश केला. शेततळे उंचावर असल्याने त्यांनी कसरत करत शेततळ्याचे टोक गाठले, मात्र तेथून घसरल्याने ते पाण्यात पडल्याने त्यांच्या पाठीमागे असलेल्या दोन्ही मुलांनी घराकडे पळ काढून ते पाण्यात पडल्याची माहिती दिल्याचे स्थानिक नागरिकांनी सांगितले. शेतीच्या परिसरात शेततळे असल्यामुळे जेसीबीद्वारे शेततळ्यातील पाणी काढण्यासही अडथळा येत होता.

अग्निशामक दलाच्या जवानांनी पाण्यात उतरलेल्या स्थानिक युवकांना मार्गदर्शन केल्यानंतर चार तासांत अर्ध्या तासाच्या फरकाने सायंकाळी साडेसातला दोघांचे मृतदेह पाण्याबाहेर काढण्यात आले. अशरफचे वडील भाजी विक्रीचा व्यवसाय करतात, तर इर्शादचे वडील आयुर्वेदिक औषधांची विक्री करतात.