मालेगाव : मालेगाव तालुक्यात गतवर्षी २७ हजार ३३० हेक्टरवर कपाशीची लागवड झाली होती. आगामी २०२४ च्या खरीप हंगामात तालुक्यात तेवढीच कपाशीची लागवड अपेक्षीत आहे. कपाशीसाठी साधारणत: एक हेक्टर क्षेत्रासाठी ४७५ ग्रॅम वजनाची ३ बी.टी. कॉटन पाकीटे लागतात. चालू वर्षात कपाशी बियाण्याच्या एक पाकिटाची किंमत ८५३ रुपये इतकी असेल. (Abundant seeds available for Kharif)

२०२४ वर्षात कपाशी लागवडीसाठी एक लाख बी. टी. कॉटन पाकीटे लागणार असून भरपूर प्रमाणात बियाणे उपलब्ध होणार असल्याची माहिती उपविभागीय कृषि अधिकारी गोकुळ आहिरे यांनी कळविली आहे. खरीप हंगामात शेंदऱ्या बोंडअळीचा प्रादुर्भाव होऊ नये यासाठी क्षेत्रिय पातळीवर आतापासूनच प्रतिबंधात्मक उपाययोजना राबविणे आवश्यक आहे.

शास्त्रज्ञांच्या मतानुसार कपाशी शेंदरी बोंड अळीचा जीवनक्रम खंडीत न झाल्याने प्रादुर्भाव वाढत असल्याचे दिसून येते. (latest marathi news)

हंगामपूर्व कपाशी लागवड झाल्यास शेंदरी बोंड अळीचा जीवनक्रमास पोषक वातावरण निर्माण होऊन प्रादुर्भाव वाढण्यास धोका निर्माण होण्याची शक्यता असते. शेंदरी बोंड अळीचा जीवनक्रम खंडीत होण्यासाठी हंगामपूर्व कपाशीची लागवड होणार नाही यादृष्टीने काळजी घेणे आवश्यक आहे.

शेतकऱ्यांनी प्रत्यक्ष लागवड १ जूननंतरच करावी असे आवाहन उपविभागीय कृषि अधिकारी गोकूळ आहिरे व तालुका कृषि अधिकारी बी. बी. गोरडे यांनी केले आहे.