येवला : येवल्याहून राजापूरकडे मोटारसायकलवरून जाणाऱ्या दोन तरुणांचा चार दिवसांपूर्वी अपघात झाला होता. या अपघातातील जखमी दोन्ही तरुणांचे निधन झाले असून, गाव परिसरात यामुळे हळहळ व्यक्त होत आहे. तालुक्यातील राजापूर येथील सुभाष शिरसाठ व शुभम सोनवणे हे तरुण सकाळी लवकर येवल्याला येऊन पुन्हा राजापूर येथे असलेल्या रसवंतिगृहासाठी बर्फ घेऊन जात होते. (Accidental death of two youths from Rajapur)

२१ मेस सकाळी पन्हाळपाटीजवळ अज्ञात वाहनाचा त्यांच्या मोटारसायकला धक्का बसला व मोटारसायकल मोरीवर आदळून या दोघांच्या डोक्याला जबरदस्त मार लागला होता. जखमी अवस्थेत त्यांना पुढील उपचारांसाठी नाशिक येथे दाखल करण्यात आले होते. मात्र, शर्थीचे प्रयत्न करूनही यश मिळाले नाही.

यातील जखमी सुभाष शिरसाठ याचे २५ मेस उपचार सुरू असतानाच निधन झाले होते. नाशिक येथे उपचार सुरू असताना शुभम सोनवणे याचा मृत्यू झाला. दोघेही अतिशय गरीब व सर्वसाधारण कुटुंबातील होते. शुभमचे वडील मृत असून, तो आपल्या कुटुंबातील कर्ता होता. आई, आजी यांचा सांभाळ तो करीत होता. (latest marathi news)

आईची रस्त्याच्या कडेला छोटी गोळ्या-बिस्किटांची टपरी असून, ती कुटुंबाचा उदरनिर्वाह करते. वाहनांच्या टायरचे पंक्चर काढण्याचे काम व टपरी चालविण्याचे काम शुभम करीत होता. सुभाष शिरसाठ याची परिस्थिती बिकटची होती. सुभाष ऊसतोडणीसाठी बाहेरगावी मजुरी कामासाठी गेला होता व ऊसतोडणीचा हंगाम संपल्याने तो घरी आला होता.

हाताला काम नसल्याने त्याने राजापूर येथील बसस्थानकावर रसवंतिगृह सुरू केले व आपल्या कुटुंबाचा उदरनिर्वाह रसवंतिगृह टाकून करीत होता. या दोन्ही तरुणांवर कुटुंबांची जबाबदारी होती. त्यांच्या निधनाने राजापूर परिसरात हळहळ व्यक्त केली जात आहे.