खामखेडा : खामखेडा येथे कोथिंबिरीचे दुबार (खोडवा) पीक घेत शून्य उत्पादनखर्चात शेतकऱ्याला ३५ ते ४० हजारांचे उत्पन्न मिळाले आहे. सध्या कोथिंबीर पिकास अल्प भाव असला तरी शून्य उत्पादनखर्चात कमी दिवसांत पिकातून पैसा झाल्याने या दुबार पिकाच्या प्रयोगाचे सर्वत्र कौतुक होत आहे. (Nashik Agricultural Khamkheda Appreciation of double cropping of coriander)

देवळा व कळवण तालुक्याच्या गिरणा नदीकाठावरील गावांमध्ये दर वर्षी जून, जुलै या महिन्यांत पुरेसे पाणी उपलब्ध असल्याने मोठ्या प्रमाणावर शेतकरी कोथिंबिरीची लागवड करतात. या वर्षी कमी पाण्यामुळे जून महिन्यात मोठ्या प्रमाणावर कोथिंबीर उत्पादक शेतकऱ्यांना चांगला बाजार असल्याने या पिकाने लखपती केले.

खामखेडा येथील शेतकरी भाऊसाहेब उमाजी देवरे यांनी देखील एक एकर क्षेत्रात २८ किलो बियाण्यांपासून जवळपास दीड लाखाची कमाई काढली. कोथिंबीर काढणीनंतर याच पिकात पाऊस सुरू झाल्याने नांगरट न झाल्यामुळे कोथिंबीर काढलेल्या शेतात पुन्हा कोथिंबीरने फुटवा केला. पुन्हा शेत नांगरण्यापेक्षा हा फुटवा शेतकऱ्याने धरल्याने सध्या हे दुबार पीक काढणीला आले आहे. (latest marathi news)

पहिल्या टप्प्यात दीड लाखाची झालेली कमाई मात्र सध्या कोथिंबिरीला अल्पसा भाव आल्याने याच क्षेत्रात जवळपास ३५ ते ४० हजार रुपये या शेतकऱ्याला मिळवून दिले आहेत. प्रथमतः पीक घेतले, त्यावेळेस २८ किलो बियाणे त्याचबरोबर मशागत यासाठीचा झालेला खर्च, मात्र दुबार पीक घेताना शून्य खर्च झाल्यामुळे आलेले सर्व उत्पादन नफ्याच्या स्वरूपात राहिल्याने त्यांच्या या दुबार पिकाच्या प्रयोगाचे खामखेडा व परिसरातील शेतकऱ्यांनी कौतुक केले आहे. सध्या कोथिंबिरीला कमी भाव असला तरी खर्च न झाल्याने येणारा पैसा हा नफाच ठरत आहे.