नाशिक : अपुरा व अनियमित पाणीपुरवठ्यामुळे सिडको विभागातील खुटवडनगर, डीजीपीनगर व वृंदावननगरच्या महिलांच्या संतापाचा बांध सोमवारी (ता. १४) फुटला. तब्बल दहा बस भरून आलेल्या महिलांनी बससह महापालिकामुख्यालयाला घेराव घातला. तीन तास हंडा घेऊन मुख्य दरवाजाच्या पायऱ्यावर बसून ठिय्या दिला. प्रशासनाकडून ठोस आश्‍वासनासह पाणीपुरवठा विभागाचे कार्यकारी अभियंता रवींद्र धारणकर यांच्या बदलीच्या प्रस्तावाचे आश्‍वासन मिळाल्यानंतर आंदोलन मागे घेतले गेले. (Angry women surrounded NMC headquarters

शहराला पाणीपुरवठा करणारे गंगापूर, दारणा व मुकणे धरण शंभर टक्के भरलेले असताना शहरात अनेक भागात महिलांना पाणीटंचाईचा सामना करावा लागत आहे. पाण्याची वेळ निश्‍चित नाही, पाणी आलेच तर त्याचा दाब अत्यंत कमी असतो. जेथे मुबलक पुरवठा आहे, तेथे गढूळ पाण्याचा पुरवठा अशा एक ना अनेक समस्या आहेत.

त्यात आता सणासुदीचे दिवस आहे. दिवाळीनिमित्त घरांची स्वच्छता सुरू झाली आहे. त्यामुळे पाण्याचा वापर वाढला आहे. तक्रार करूनही दखल घेतली जात नाही. अशा परिस्थितीत संतप्त महिलांनी प्रभाग क्रमांक २८ चे माजी नगरसेवक दीपक दातीर, सुवर्णा मटाले, डी. जी. सूर्यवंशी यांच्या नेतृत्वाखाली थेट महापालिका मुख्यालय गाठले.

महिलांच्या तीव्र भावनांचे दर्शन व्हावे यासाठी सहा बसमधून महिला महापालिकेत दाखल झाल्या. पाणी आमच्या हक्काचं, नाही कोणाच्या बापाचं, आर या पार या....आयुक्त साहेब बाहेर या. अशा घोषणा देत महिलांनी संताप व्यक्त केला. आंदोलनकर्त्या कमल पाटील यांनी दररोज फक्त तीन हंडे पाणी येत असल्याची तक्रार केली.

सुनीता हसे यांनी सणासुदीच्या तोंडावर पाणी नसल्याने कामे करता येत नसल्याची खंत व्यक्त केली. विमल ताकाटे यांनी अपुऱ्या पाणीपुरवठ्यामुळे पाहुण्यांना बोलविता येत नसल्याचे सांगितले. पायऱ्यांवरच हंडे ठेवत आयुक्त स्वतः येत नाही, तोपर्यंत हटणार नसल्याची भूमिका घेण्यात आली. पाणीपुरवठा विभागाचे कार्यकारी अभियंता रवींद्र धारणकर यांच्या बदलीची मागणी या वेळी करण्यात आली. महापालिकेचे आयुक्त डॉ. अशोक करंजकर यांच्यातर्फे शहर अभियंता संजय अग्रवाल यांनी निवेदन स्वीकारले. (latest marathi news)

"सुरळीत पाण्याचे तसेच कार्यकारी अभियंत्यांच्या बदलीचा प्रस्ताव तयार करण्याचे आश्‍वासन मिळाले. लवकर निर्णय न झाल्यास पुन्हा आंदोलन करू."

- दीपक दातीर, माजी नगरसेवक

"धरणात पुरेसे पाणी असूनही सिडकोवासीयांना पाणी नाही. तक्रारींकडे दुर्लक्ष केले जाते. आयुक्त भेटत नाही."- सुवर्णा मटाले, माजी नगरसेविका

"आज शांततेत आंदोलन केले. पाणीपुरवठा सुरळीत न झाल्यास आंदोलन अधिक तीव्र करू."

- डी. जी. सूर्यवंशी, माजी नगरसेवक

आंदोलनात महत्त्वाचे

- पाणीप्रश्‍नावर महापालिकेवर तब्बल पाचवे आंदोलन

- सकाळी ११ ते दुपारी दोनपर्यंत महिलांचा ठिय्या

- पाणीप्रश्‍नावरून दोन्ही शिवसेना एकत्र

- ५० सीटरच्या सहा बस मुख्यालयाच्या प्रवेशद्वारापर्यंत

- आयुक्त डॉ. अशोक करंजकर यांच्याविरोधात घोषणाबाजी

- आंदोलनानंतर पाण्याचा बाटल्यांचा प्रवेशद्वारासमोर खच