नांद्रा: येथील बँक ऑफ बडोदा शाखेत पीककर्जासाठी टाळाटाळ केली जात असल्याची तक्रार शेतकऱ्यांकडून केली जात आहे. येथील शेतकरी एकत्र कुटुंबकर्त्या सुमनबाई पाटील यांनी बँक ऑफ बडोदा शाखेतून दोन ते तीन वेळा पीककर्ज घेतले होते. २०२० मध्ये कर्जमाफीचा लाभ मिळण्यास अल्पभूधारक असतानाही ऑनलाइन प्रक्रिया करताना इतर खात्याला हे खाते जोडल्यामुळे कर्जमाफी घेण्यासाठी दोन वर्षे निघून गेली.

त्यातच कर्जमाफी घेतलेल्या लाभार्थ्यांना फक्त ५० टक्के कर्ज योजना आली असता, कोरोना काळ असल्याने २०२० नंतर पीककर्ज घेतले नाही. सातबारावर कोणत्याही प्रकारचा बोजा नाही. लाभार्थ्याचा ‘सिबिल’ स्कोरही चांगला असतानाच शाखा व्यवस्थापक दीपक टोंगे टाळाटाळ करीत असल्याची तक्रार शेतकऱ्याने केली आहे. टोंगे यांच्याकडे पीककर्ज मागणी केली. त्यावर बँक व्यवस्थापक टोंगे यांनी सांगितले, की माझ्याकडे अर्ज करा, एकत्र कुटुंबकर्त्याला बँकेच्या पॉलिसीनुसार पीककर्ज देता येत नाही. वर आमच्या वकिलांशी बोलून यावर काय अभिप्राय येतो, तेव्हा मी आपल्याला लेखी सांगेल. आजपर्यंत कर्ज मिळत होते. सातबारावर एकच नाव असतानाच शाखा व्यवस्थापक मनमानी करीत आहेत. अशा मुजोर शाखा व्यवस्थापकावर योग्य ती कारवाई करण्याची मागणी केली आहे. याबाबत अनेक ग्राहक पात्र असतानाही शाखेतून कर्ज मिळत नसल्याच्या तक्रारी आहेत.

बँकेच्या पॉलिसीनुसार पीककर्ज देताना एचयूएफ हिंदू एकत्रित कुटुंबाला पीककर्ज देता येत नाही. तुमचे कर्जप्रकरण मी वरिष्ठांना पाठवेल. त्यावर काय अभिप्राय येतो, तेव्हा तो मी आपल्याला देईल.

-दीपक टोंगे, शाखा व्यवस्थापक, बँक ऑफ बडोदा, नांद्रा

मी एक सैन्यदलातील पेन्शनर शेतकरी आहे. आजपर्यंत मी बँक ऑफ बडोदा शाखेतून पीककर्ज घेतले आहे. तेव्हाही नोंद एकत्र कुटुंब कर्ता होती. मात्र, तेव्हा पीककर्जाला अडचणी आल्या नाहीत. सातबारा उतारा कोरा असताना, बँक व्यवस्थापकांकडून टाळाटाळ केली जात आहे.

-सुमनबाई पाटील, शेतकरी, नांद्रा