वणी : येथील सापुतारा रस्त्यावरील जगदंबा पेट्रोल पंपा समोर विज प्रवाह असलेली तार तुटून बैलावर पडल्याने विजेच्या धक्क्याने जागीच ठार झाला आहे. सुदैवाने यावेळी तारेखाली वाहन अथवा व्यक्ती न सापडल्याने मोठी जिवीत हानी टळली. वणी व परीसरात दोन दिवसा पासुन संततधार पाऊस सुरू आहे. ता. ४ ऑगस्ट रोजी सकाळी आठ ते साडेआठ वाजेच्या सुमारास थोडासा पाऊस उघडला त्याच दरम्यान आडोश्याला उभा असलेला बैल बाजुला आला. (Bullock dead by electric shock after wire fell on Vani Saputara road )

त्याच वेळेस चालु प्रवाह असलेली विजेची तार बैलावर पडल्याने विजेच्या धक्क्याने बैलाचा मृत्यु झाला. ही बातमी महावितरण कंपनीच्या कर्मचाऱ्यांना कळताच लागलीच विज पुरवठा खंडित करण्यात आला. ग्रामपंचायतला कळविण्यात आले कर्मचारी ही घटनास्थळावर दाखल झाले होते. विजेची तार काढुन दुरूस्त करून विज पुरवठा सुरळीत करण्यात आला.

हा बैल मोकाट असल्याने त्याचा मालक कोणीच पुढे आले नाही किंवा त्याला या बाबत माहिती नसावी महावितरण कंपनीच्या कर्मचाऱ्यांनी लागलीच विज पुरवठा सुरळीत केला असल्याची माहिती महावितरण कंपनीचे वणी कार्यालयाचे कनिष्ठ अभियंता महेंद्र मुळकर यांनी दिली. तसेच या ठिकाणी कुशल राऊत, गणेश राऊत, संदिप चौरे, श्याम कुवर, माधव भरसट, मधुकर गावित या कर्मचाऱ्यांनी या ठिकाणी येऊन तुटलेल्या तारा जोडुन पुरवठा सुरळीत केला.