Nashik Citylinc Bus : सिटीलिंक बससेवेतील चालक व वाहक नागरिकांशी असभ्य वागत असल्याने तसेच वाहतुकीचे नियम न पाळता बेशिस्तीने बस चालवत असल्याने चालक, वाहकांना शिस्त लावावी, असे निवेदन राष्ट्रवादी युवक काँग्रेसचे शहराध्यक्ष अंबादास खैरे यांनी नाशिक महानगर परिवहन महामंडळाचे व्यवस्थापकांना दिले. शहरात सिटीलिंकच्या माध्यमातून नाशिककरांसाठी बससेवा सुरू करण्यात आली आहे. (Nashik citylinc Unruly bus drivers marathi news)

परंतु बसचालक बेशिस्तीने बस चालवत असून, त्याचा त्रास नागरिकांना सहन करावा लागत आहे. बस चालवताना शिस्त न पाळता एकाच वेळी शेजारी, शेजारी बस चालविणे, रस्त्यात बस थांबवून इतर वाहनचालकांना रस्ता न देणे, बसथांब्यावर व्यवस्थित बस न थांबविणे, थांब्यापासून दूर थांबवणे, वेगाने गाडी चालवून इतर वाहनांना ओव्हर टेक करणे, रस्त्यावरील इतर वाहनांना कट मारणे, असे सर्रास प्रकार चालक करत आहेत.

त्यांच्या बेशिस्तपणामुळे वाहतूक कोंडीत भर पडत आहेत. तसेच वाहक प्रवाशांसोबत अरेरावी करत असून सुट्टे पैशासाठी वाद घालणे, महिला वर्गासोबत असभ्य वागणे, गर्दीच्या वेळी अरेरावी करणे असे प्रकार प्रत्येक बसमध्ये घडत आहे. चालक व वाहक यांना शिस्तीचे धडे देऊन योग्य ती कारवाई करण्यात यावी असे निवेदनात म्हटले आहे.

या वेळी अमोल नाईक, मुकेश शेवाळे, डॉ. संदीप चव्हाण, विशाल डोखे, संदीप गांगुर्डे, दीपक पाटील, रामदास मेदगे, संदीप खैरे, राहुल पाठक, अक्षय पाटील, रवींद्र शिंदे, सागर मोरे, सौरभ राठोड, मंगेश दरोडे, किशोर पवार आदींसह मोठ्या संख्येने पदाधिकारी व कार्यकर्ते उपस्थित होते. (latest Marathi News)