Civil Services Exam : केंद्रीय लोकसेवा आयोगाच्या नागरी सेवा परीक्षा २०२३ चा अंतिम निकाल मंगळवारी (ता.१६) जाहीर झाला. या परीक्षेत नाशिकच्‍या आठ उमेदवारांनी यश मिळविल्याने त्यांना प्रशासकीय सेवेचे द्वार खुले झाले आहे. विनय सुनील पाटीलने १२२ वा, जान्‍हवी शेखर हिने १४५ वा क्रमांक पटकावला आहे. तर उत्‍सव राका, सागर भामरे, प्रियांका मोहिते, आविष्कार डर्ले, कुणाल अहिरराव, प्रशांत डगळे, सूरज निकम यांनी यश मिळविले आहे. (nashik Civil Services Exam Success of 8 people from Nashik in Civil Services Exam marathi news)

केंद्रीय लोकसेवा आयोगातर्फे नागरी सेवा परीक्षा २०२३ चे आयोजन गेल्‍या वर्षी सप्‍टेंबर महिन्‍यात केले होते. तसेच मुलाखतीचे आयोजन यंदा जानेवारी ते एप्रिलदरम्‍यान केले होते. त्‍या आधारे निवड यादी प्रसिद्ध केली आहे. या यादीत निळवंडी (ता. दिंडोरी) येथील विनय सुनील पाटील १२२ व्‍या क्रमांकावर राहिला. नाशिकची जान्‍हवी शेखर १४५ व्‍या क्रमांकाने उत्तीर्ण झाली आहे. (latest marathi news)

शहरातील उत्‍सव राका २७० वा, वनोली (ता. बागलाण) येथील सागर संजय भामरे ५२३ वा, येवला तालुक्‍यातील प्रियांका सुरेश मोहिते ५९५ वी, शिंगवे (ता. निफाड) येथील आविष्कार विजय डर्ले ६०४ वा, लखमापूर (ता. बागलाण) येथील सूरज प्रभाकर निकम हा ७०६ वा, ओझर येथील कुणाल अहिरराव ७३२ वा आणि जेलरोड येथील प्रशांत डगळे ७७५ व्‍या क्रमांकाने उत्तीर्ण झाला आहे.

या यशस्‍वी उमेदवारांमध्ये जान्‍हवी आणि प्रशांत यांनी दुसऱ्यांदा यश मिळविले आहे. आयोगाने गुणवत्ता यादी व अखिल भारतीय सेवांसाठी निवड झालेल्‍या उमेदवारांच्‍या नावाचा तपशील जारी केला आहे. यामध्ये अखिल भारतीय प्रशासकीय सेवा (आयएएस) साठी १८०, आयएफएससाठी ३७, आयपीएससाठी २००, केंद्रीय सेवा गट अ साठी ६१३, गट ब साठी ११३ अशा एकूण एक हजार १४३ उमेदवारांची यादी प्रसिद्ध केली आहे.