Nashik News : येथील शहर-ग्रामीण पोलिस कर्मचाऱ्यांची नाशिक पोलिस को-ऑपरेटिव्ह सोसायटीच्या नुकत्याच पार पडलेल्या पंचवार्षिक निवडणुकीनंतर आता अध्यक्षपदासाठी चुरस निर्माण झाली आहे. येत्या सोमवारी (ता. ५) अध्यक्षपदाची निवड केली जाणार असून यासाठी इच्छुकांकडून मोर्चेबांधणी सुरू झाली आहे. निवडणुकीत परिवर्तन पॅनलचे नऊ तर प्रगतीचे सहा उमेदवार विजयी झाले असून, दक्षता पॅनलचा एकही उमेदवार विजयी होऊ शकलेला नाही.

नाशिक पोलिस को-ऑपरेटिव्ह सोसायटीसाठी गेल्या २१ जुलैला मतदान होऊन दुसऱ्या दिवशी निकाल जाहीर झाला होता. यात सर्वसाधारण गटातून प्रगती पॅनलचे विक्रम कडाळे, गणेश कोंडे, अविनाश जुंदरे, कपालेश्वर ढिकले, गणेश पिंगळे, तर परिवर्तन पॅनलचे विशाल काठे, संदीप झाल्टे, प्रशांत मरकड, रूपेश मुळाणे.

संदीप हांडगे विजयी झाले. महिला राखीव गटातून प्रगतीच्या अश्विनी देवरे व परिवर्तनमधून योगिता काकड तर, इतर मागास प्रवर्गातून परिवर्तनचे उमेदवार योगेश राऊत, अनुसूचित जाती जमातीतून जालिंदर खराटे, विमुक्त जाती, भटक्या जमाती व विशेष मागास प्रवर्गातून विश्वनाथ काकड हे विजयी झाले होते. (latest marathi news)

दरम्यान, सोमवारी (ता. ५) सोसायटीच्या अध्यक्षपदासाठी बैठक होत आहे. या वेळी सोसायटीच्या अध्यक्षपदाची माळ कोणाच्या गळ्यात पडते याकडे पोलिस सभासदांचे लक्ष लागले आहे. यासाठी इच्छुक असलेल्या उमेदवारांकडून मोर्चेबांधणी सुरू झाली आहे. परिवर्तन पॅनलकडे बहुमत असल्याने त्यांचाच अध्यक्ष होण्याची चिन्हे असली एकापेक्षा अधिक उमेदवार असल्यास संचालकांच्या मतदानातून निवड केली जाण्याची शक्यता आहे.

पोलिस सोसायटीच्या अध्यक्षपदासाठी रूपेश मुळाणे, योगिता काकड, जालिंदर खराटे, संदीप हांडगे हे संचालक इच्छुक आहेत. परंतु उर्वरित संचालकांमधून बैठकीत दावा केला जाण्याची शक्यता नाकारता येत नाही. त्यामुळे सोमवारच्या बैठकीत नूतन अध्यक्षांच्या नावावर शिक्कामोर्तब होणार असून, त्याकडेच पोलिस सभासदांचे लक्ष लागून आहे.