Nashik News : उत्तमनगर परिसरातील शिवपुरी चौक येथे गेल्या चार ते पाच दिवसांपासून दुर्गंधीयुक्त पाणी पुरवठा होत असल्याने येथील नागरिकांचे आरोग्य धोक्यात आले असल्याने महिला वर्गात संतप्त भावना उमटत आहेत. शिवपुरी चौक येथे सायंकाळी पाणीपुरवठा होत असतो. मात्र गेल्या चार ते पाच दिवसांपासून होणाऱ्या पिण्याच्या पाण्यात ड्रेनेजच्या पाण्याचा वास येत असल्याने नागरिकांना पिण्याच्या पाण्यासाठी वणवण करावी लागत आहे. ()

याबाबत स्थानिक नागरिकांनी तक्रार करूनही दुर्गंधीयुक्त दुषित पाणीपुरवठा सुरू असल्याने येथील नागरिकांचे आरोग्य धोक्यात आले आहे. प्रश्नाकडे महापालिकेच्या पाणीपुरवठा विभागाने दुर्लक्ष केल्याने महिला वर्गात संतप्त प्रतिक्रिया उमटत आहेत.

तरी शिवपुरी चौकात स्वच्छ पाणीपुरवठा न झाल्यास नागरिकांतर्फे जनआंदोलन छेडण्यात येईल, असा इशारा सचिन परदेशी, बाळासाहेब भगत, शिवाजी भोज, दत्तू चिखले, कमलेश पाटील, विनय मोहोड, दिपक पाटील, सिद्देश सानप, आशा परदेशी, नंदा चिखले, संगीता सायंदर, शैला भगत, शितल कोठुळे, सुरेखा पाटील, जयश्री रोकडे, ताराबाई गुरव आदींसह परिसरातील नागरिकांनी दिला आहे. (latest marathi news)

तक्रार करूनही दखल नाही

सहा महिन्यांपासून सिडको परिसरामध्ये मोठ्या प्रमाणात पाण्याबाबत आणीबाणी सुरू असल्याचे दिसून येत आहे. वारंवार तक्रार करूनही मनपा प्रशासनातील अधिकारी कुठल्याही प्रकारची तजवीज करताना दिसत नाही. नळांना दुर्गंधीत पाणी येणे, कमी दाबाने पाणीपुरवठा होणे, काही भागांमध्ये पाणीच न येणे यामुळे काही भागांमध्ये टॅंकरने पाणीपुरवठा करण्याची वेळ नागरिकावर आल्याने महिला वर्गात मोठ्या प्रमाणात संतापाचे वातावरण असल्याचे दिसून येत आहे. याबाबत महापालिका आयुक्तांनी अधिकाऱ्यांवर कारवाई करण्याची गरज आहे.