नाशिक : गंगापूर पोलीस ठाण्याच्या हद्दीतील कृषीनगर जॉगींग ट्रॅकजवळील सिद्धार्थनगर येथे टोळक्याच्या दोन गटात धारदार हत्यारे, लाकडी दांडक्यासह प्राणघातक हल्ला चढविला. टोळक्याच्या या हल्ल्यात परिसरातील चार वाहनांचेही नुकसान झाले असून, याप्रकरणी गंगापूर पोलिसांनी नऊ संशयितांच्या मुसक्या आवळल्या आहेत. शांताराम ताठे, चंदू ताठे, संतोष ताठे, गणेश जाधव, शेखर उर्फ गोट्या ताठे, प्रफुल्ल ताठे, सागर जाधव, अमोल जाधव, दीपक जाधव अशी अटक करण्यात आलेल्या टोळक्यातील संशयितांची नावे आहेत. (Gang assault vandalized vehicles near Krishinagar jogging track )

गंगापूर पोलिस ठाण्याचे उपनिरीक्षक मोतीलाल पाटील यांच्या फिर्यादीनुसार, गुन्हा दाखल करण्यात आलेल्या संशयितांमध्ये सोमवारी (ता. ७) मध्यरात्री सिद्धार्थनगर येथे दोन्ही गटांत काही कारणातून वाद झाल्याने एकमेकांना मारहाण करताना लाकडी दांडे व हत्यारांचा वापर केला. एकमेकांवरील या हल्ल्यात परिसरातील रस्त्यालगत पार्क केलेल्या चार कारचे नुकसान केले.

यात दोन कारच्या (एमएच १५ सीटी ०४७१ व एमएच ०४ बीवाय ८८८२) कारच्या काचा फोडल्या. यासह दोन दुचाक्यांचे (एमएच १५ जेएफ ८९३३ व एमएच १५ एफडी ४८८०) तोडफोड केली. याप्रकरणी गंगापूर पोलिसात गुन्हा दाखल केला असून, पोलिसांनी ९ संशयितांना जेरबंद केले आहे. गुन्ह्याचा हवालदार बागुल हे करीत आहेत.