Nashik Crime News : जिल्ह्यातील पेठ वन विकास महामंडळाच्या राखीव वनक्षेत्रात अवैधरीत्या खैर झाडाची तोड करून वाहतूक करणारे वाहन वन विकास महामंडळाच्या अधिकारी व कर्मचाऱ्यांनी जप्त केले. यावेळी खैर तस्कर संशयित विष्णू बन्सी राऊत (रा. खिर्डी ता. सुरगाणा) पळून जाण्यात यशस्वी झाला. पेठ, अंबाझरी वन परीक्षेत्रात वन अधिकारी गस्त करीत असताना मिळालेल्या गोपनीय माहितीच्या आधारे कक्ष क्रमांक ७८ नवापाडा बीट मधून काही संशयित अवैधरीत्या खैर झाडाची तोड करून वाहतूक करणार असल्याची माहिती मिळाली होती. ( Illegal transport vehicle of khair wood seized by police )

यानंतर गस्ती पथकाने या भागात सापळा रचत खैर लाकडाची वाहतूक करणारे एक वाहन अडविले. वनविभागाने वाहन अडविल्याचे कळतात सराईत खैर तस्कर विष्णू राऊत याने वाहन तसेच सोडून पळ काढला. यावेळी पथकाने त्याचा पाठलाग केला. मात्र घनदाट जंगलात पळून जाण्यात तो यशस्वी झाला. यानंतर पथकाने खैर लाकूड आणि महिंद्रा कंपनीची पिकअप जप्त केली. विष्णू बन्सी राऊत याच्यावर वन विभागात वेगवेगळ्या ठिकाणी यापूर्वीही गुन्हे दाखल झालेले आहेत. (latest marathi news)

वन प्रकल्प विभागाचे विभागीय व्यवस्थापक डॉ. एस.एन. नेवसे, सहाय्यक व्यवस्थापक धीरज परदेशी, वनपरिक्षेत्र अधिकारी रमेश बलैया, बी.डी.शेवाळे यांच्या मार्गदर्शनाखाली वनपाल सी. जे. चौरे, एन.एस.पवार, माधुरी साळुंके, वनरक्षक मंगेश वाघ, के. व्ही. राठोड, जी. एस. म्हस्के, एस. के. बोरसे, दीपक डफळ, डी. एम. खिराडी व डी. पी. बोंबले यांनी ही कारवाई केली.

आपट्याच्या फांद्याखाली लाकूड

खैर लाकडाची तस्करी करताना ते सहजासहजी वन किंवा पोलिसांच्या नजरेस पडून जप्त होवू नये म्हणून खैर तस्कर विष्णू राऊत याने लाकडांवर आपट्याच्या झाडाच्या फांद्या टाकल्या होत्या. मात्र खैराची तस्करी होणार असल्याची पक्की माहिती असल्याने वनविभागाच्या पथकाने ही तस्करी उघडकीस आणली.