Nashik Crime News : सातपूर औद्योगिक वसाहत परिसरात १७ वर्षीय अल्पवयीन पीडितेला मित्राच्या घरी बोलावून संशयिताने बलात्कार केला. तसेच, घटनेची वाच्यता करू नये म्हणून धमकावलेही. परंतु त्रास होऊ लागल्याने तिने घडलेल्या प्रकाराची माहिती कुटुंबीयांना दिली. याप्रकरणी सातपूर पोलिसात पोक्सोअन्वये बलात्काराचा गुन्हा दाखल झाला आहे. दरम्यान, संशयितही अल्पवयीन असल्याचे समोर येत आहे. (Nashik Crime Minor girl assaulted by taking advantage of identity marathi news)

पीडित मुलीने सातपूर पोलिसांना दिलेल्या फिर्यादीनुसार, औद्योगिक वसाहत परिसरात राहणाऱ्या तिच्याच वयातील संशयित मुलाशी तिची ओळख झाली होती. त्यांच्यात वारंवार बोलणेही होत होते. दरम्यान, ओळखीचा गैरफायदा घेत, २८ जानेवारी रोजी दुपारी एक वाजता संशयिताने पीडितेला त्याचा मित्र सोनू भोसले याच्या घरी बोलावले.

पीडिता त्याठिकाणी गेली असता, तिला संशयिताने घरात कोंडून घेत तिच्यावर बळजबरीने अत्याचार केला. तसेच, घडलेल्या घटनेची कोठेही वाच्यता न करण्याची व कुटुंबीयांना जीवे मारण्याचीही धमकी दिली. त्यामुळे भेदरलेल्या पीडितेने माहिती दिली नाही.

परंतु गेल्या काही दिवसांपासून तिला पोटदुखीचा त्रास होऊ लागल्याने तिने अत्याचाराची माहिती कुटुंबीयांना दिली. कुटुंबीयांनी याप्रकरणी सातपूर पोलिसांत धाव घेत तक्रार दिली. पीडितेच्या फिर्यादीनुसार पोक्सोसह बलात्कार आणि धमकावल्याप्रकरणी गुन्हा दाखल झाला आहे. गुन्ह्याचा तपास उपनिरीक्षक नळकांडे हे करीत आहेत.