Nashik Crime News : लोकसभा निवडणुकीच्या पार्श्वभूमीवर शहर पोलिसांनी अवैध धंद्यांविरोधात धडक कारवाईचा बडगा उगारला आहे. पंचवटी, अंबड आणि सातपूर पोलिस ठाण्याच्या हद्दीतील अवैधरीत्या सुरू असलेल्या दारू अड्ड्यांवर धाडी टाकून ते उद्ध्वस्त करीत, सुमारे सात हजारांचा देशी दारूचा साठा जप्त केला आहे. येत्या काळात अवैध धंद्यांविरोधात कारवाईचा बडगा आणखी वाढणार असल्याचे संकेत पोलिसांनी दिले आहेत. (Nashik Crime Police raid on illegal liquor dens marathi News )

पंचवटी पोलिस ठाण्याच्या हद्दीतील फुले नगरमधील कालिका नगरमध्ये चोरी-छुपे सुरू असलेल्या अवैध देशी दारू विक्री अड्ड्यावर सोमवारी (ता.१८) सायंकाळी पाचच्या सुमारास छापा टाकला. यावेळी संशयित विजय आचारी (२४, रा. कालिका नगर, पेठ रोड) यास अटक करून त्याच्याकडून १ हजार ९६० रुपयांचा अवैध देशी मद्यसाठा व १ हजार रुपये रोख असा २ हजार ९६० रुपयांचा मुद्देमाल जप्त केला आहे.

याप्रकरणी पंचवटी पोलिसात गुन्हा दाखल झाला आहे. सातपूर हद्दीतील कुबेर स्वामी पेट्रोल पंपामागे असलेल्या पत्र्याच्या शेडमध्ये अवैध देशी दारूची विक्री केली जात होती. सातपूर पोलिसांनी रवींद्र सूर्यवंशी (४८, रा. सातपूर, मूळ रा. ता. चाळीसगाव, जि. जळगाव) यास ताब्यात घेऊन त्याच्याकडून ३ हजार ३६० रुपयांचा मद्यसाठा जप्त केला आहे.

सातपूर पोलिसांत याप्रकरणी गुन्हा दाखल केला आहे. तर चुंचाळे शिवारातील पत्र्याच्या शेडमध्ये अवैध देशी दारू विक्री करताना संशयित देविदास आरने (७६, रा. घरकुल चुंचाळे योजना, अंबड) यास पकडले. संशयिताकडून १ हजार १९० रुपयांचा देशी मद्यसाठा जप्त केला असून, याप्रकरणी अंबड पोलिसात गुन्हा दाखल झाला आहे.