Nashik Crime : वडाळागावात पोटदुखीच्या उपचारासाठी आलेल्या १९ वर्षीय विवाहितेवर बलात्कार करणाऱ्या मौलवीला न्यायालयाने न्यायालयीन कोठडी सुनावल्याने त्याची नाशिक रोड मध्यवर्ती कारागृहात रवानगी करण्यात आली आहे. (Rapist maulavi sent to Central Jail)

हुसन यासीम शेख (३२, रा. मेहमूद नगर, वडाळागाव) असे संशयित मौलवीचे नाव आहे. याप्रकरणी इंदिरानगर पोलिस ठाण्यात गुन्हा दाखल आहे. पीडित नवविवाहितेचा चार महिन्यांपूर्वीच विवाह झाला होता. तिला पोटदुखीचा त्रास असल्याने तिच्यावर डॉक्टरांकडे उपचार केले.

मात्र, उपचारानंतरही आराम न मिळाल्याने तिची सासू व नणंद आणि पतीने विवाहितेस वडाळागावातील संशयित हुसन शेख या मौलवीकडे नेले. हुसन हा परिसरात हकिम म्हणून वावरत होता. आयुर्वेदिक उपचार करत असल्याचे तो भासवत असल्याचे पोलिसांनी सांगितले.

पीडितेस त्याच्याकडे नेल्यानंतर त्याने उपचार करण्याच्या बहाण्याने पैशांची मागणी केली. तसेच २६ जुलै रोजी सायंकाळी सहा वाजता पीडिता तिच्या नातलगांसोबत हकिमाकडे उपचारासाठी गेली असता त्याने नातलगांना बाहेर बसवले. (latest marathi news)

पीडितेस घरात नेत तिला पावडरसदृश भूगा खाण्यास देत तिच्या चेहऱ्यावर गुंगीकारक पावडरची फुंकर मारली. त्यामुळे पीडितेची शुद्ध हरपली. यानंतर संशयिताने विवाहितेवर अत्याचार केला. ही बाब पीडितेस समजल्यानंतर तिने इंदिरानगर पोलिसांकडे तक्रार केली. त्यानुसार पोलिसांनी गुन्हा दाखल करून संशयित शेख यास अटक केली.

पोलिस कोठडीची मुदत संपल्याने त्यास पुन्हा न्यायालयात हजर केले असता, त्याची रवानगी मध्यवर्ती कारागृहात केली आहे. दरम्यान, संशयित मौलवीने उपचाराच्या नावाखाली आणखीही काही महिलांवर अत्याचार केला असण्याची शक्यता आहे. त्यासाठी पीडितांनी पोलिसांकडे तक्रार करावी, असे आवाहन इंदिरानगर पोलिसांनी केले आहे.