Nashik News : गंजमाळ पंचशील नगर येथील तडीपार संशयित पांडुरंग शिंगाडे याचा खून झाल्याची घटना शुक्रवारी (ता.५) रोजी घडली होती. त्याचे मारेकरी अद्याप फरार असून भद्रकली गुन्हे शोध पथकासह शहर गुन्हे शाखेचे विविध पथक त्यांच्या मागावर आहे. (Suspects missing in murder case)

मयत पांडुरंग शिंगाडे काकाच्या दशक्रिया विधीसाठी शहरात आला होता. शुक्रवारी (ता.५) पहाटे साडेतीनला तिघां संशयितांनी शिंगाडे याच्या घरात शिरून त्याच्यावर धारधार शस्त्राने वार करत त्याचा खून केला. याप्रकरणी भद्रकाली पोलिस ठाण्यात संशयित कैलास गायकवाड, निखिल सच्चे आणि अन्य एका संशयीताविरुद्ध गुन्हा दाखल करण्यात आला.

पोलिसांनी संशयितांच्या शोधात पथक रवाना केले. त्यांना अद्याप यश आलेले नाही. भद्रकली गुन्हे शोध पथकासह पोलिस आयुक्तालयातील शहर गुन्हे शाखेचे विविध पथक त्यांच्या शोधात रवाना झाले आहे. (latest marathi news)

पोलिसांनी संशयितांच्या काढलेल्या माहितीनुसार मुख्य संशयित कैलास गायकवाड यांच्याविरुद्ध आडगाव पोलिस ठाण्यात तीन तर मुंबई नाका पोलिस ठाण्यात एक गुन्हा दाखल असल्याची माहिती समोर आली आहे.

निखिल सच्चे ही सराईत गुन्हेगार असून दोघे संशयित ताब्यात आल्यानंतर अन्य संशयितांची नावे आणि माहिती समोर येण्याची शक्यता पोलिसांनी व्यक्त केली.