Nashik Cyber Crime News : स्‍टॉक ट्रेडिंगच्‍या नावाने फसवणुकीची अनेक प्रकरणे आत्तापर्यंत समोर आलेली आहेत. या फसवणुकीच्या रक्‍कमची इमले वाढतच चालले आहेत. स्‍टॉक ट्रेडिंगच्‍या नावाने नुकताच दोघांची तब्‍बल ७६ लाख १६ हजार ८०५ रुपयांची फसवणूक झाली असून, याप्रकरणी सायबर पोलिस ठाण्यात गुन्‍हा दाखल करण्यात आला आहे. डिसेंबर २०२३ ते फेब्रुवारी २०२४ या दरम्‍यान वेळोवेळी फोनद्वारे व इंटरनेटच्‍या माध्यमातून हे पैसे भामट्यांनी उकळले. (Nashik Cyber ​​Crime 76 lakh fraud news)

याप्रकरणी राजेश धरमदास सचदेव (५४, रा. जुना गंगापूर नाका) यांनी सायबर पोलिस ठाण्यात फिर्याद दिली आहे. त्‍यांना व त्‍यांच्‍या सहकार्यास भामट्यांनी वेगवेगळ्या व्‍हॉटसॲपच्‍या माध्यमातून संपर्क साधला. व केकेआर प्रो या मोबाईल ॲपमध्ये इन्‍स्‍टिट्यूशनल अकाउंटच्‍या माध्यमातून स्‍टॉक मार्केटमध्ये पैसे लावण्याचे आमिष दाखविले.

ट्रेडिंगद्वारे जास्‍त नफा मिळवून देण्याचे आमिष दाखविताना डिसेंबर २०२३ ते २७ फेब्रुवारी २०२४ या कालावधीत वेळोवेळी वेगवेगळ्या बँक खात्‍यांमध्ये जैसे वर्ग करण्यास सांगितले. परंतु परतावा मिळत नसल्‍याने आपली फसवणूक झाल्‍याचे लक्षात आल्‍यानंतर फिर्यादीदारांनी सायबर पोलिस ठाणे गाठताना फिर्याद दाखल केली आहे.   (latest marathi news)

ज्‍या क्रमांकावरून व्‍हॉटसॲपद्वारे संपर्क साधण्यात आला, त्‍या क्रमांकासह पैसे अदा केलेल्‍या बँक खातेधारकांविरोधात गुन्‍हा दाखल करण्यात आला आहे. दरम्‍यान, शेअर ट्रेडिंगच्‍या नावाने आर्थिक फसवणुकीचे यापूर्वीही अनेक प्रकरणे समोर आलेली आहेत. या फसवणुकीच्या प्रकारांमध्ये रक्‍कम वाढतच चालली आहे. तर फसवणूक करणाऱ्या भामट्यांना गजाआड करण्याचे आव्‍हान सायबर पोलिसांपुढे असणार आहे.